د ریاستالوزراء اقتصادي مرستیال ملا عبدالغني برادر اخوند نن د هرات ـ غور سړک د جوړولو چارې پیل کړې.
له اقتصادي معاونیت څخه په خپره شوې خبرپاڼه کې ویل شوي، چې د هرات ـ غور سړک د چارو په پیلېدو مراسمو ته گڼ دولتي مسوولین هم راغلي وو.
ښاغلي بردار وویل، د ترانسپورت سکتور د هېواد په اقتصادي وده کې مهم رول لري او اسلامي امارت همدې اهمیت ته په کتو، یاد سکتور په خپلو لومړیتوبونو کې نیولی، چې د پراختیا او اساسي جوړونې په موخه یې له گاونډیو او سیمې هېوادونو سره پرلهپسې مجلسونه دوام لري.: «د اسلامي امارت په راتگ سره عملاً د لویو لارو د بیارغونې کارونه پيل شوي چې له جملې یې دا دی نن د هرات – غور سړک د عملي چارو پرانیسته کوو. دغه سړک د افغانستان له مهمو ملي او لویو پروژو څخه دی، چې د ځمکني ترانسپورت له لارې هرات، غور، بامیان، دایکندي او میدان وردگ ولایتونه له کابل سره نښلوي.»
نوموړي وویل، د دغه ترانسپورتي دهلېز په مسیر کې د مالگې او مرمر ډبرو کانونه هم شته چې بشپړېدل به یې د سوداگرۍ د پراختیا او سیمهییز ترانزیټ په برخه کې مهم رول ولوبوي.
ښاغلي برادر د غور ولایت ولسونو ته ډاډ ورکړ، چې د اسلامي امارت شته امکاناتو ته په کتو هڅه کوي چې په دغه ولایت کې نورې پروژې هم پیل کړي.
د هرات ـ غور سړک د جوړولو چارې داسې مهال پیلېږي، چې له پرون راهیسې په هرات کې د پاشدان بند او د درې مهمو تولیدي کارخونو پرانیسته هم وشوه.