د بغلان د کلیو بیارغونې او پراختیا ریاست وايي، د دغه ولایت په مرکزي بغلان، ډنډ غوري، دوشي او پلخمري ولسوالیو کې یې د اوبو رسولو څلور شبکې گټه اخیستنې ته سپارلې دي.
له یاد ریاست څخه په خپره شوې خبرپاڼه کې ویل شوي، د یادو شبکو له لارې ۸۰۰ کورنیو ته د څښاک پاکې اوبه برابرې شوې دي.
د خبرپاڼې له مخې، د اوبو رسولو یادې شبکې د پن اپل کمېټې په مالي ملاتړ جوړ شوې دي؛ خو په خبرپاڼه کې نه دي ویل شوي چې په یادو شبکو څومره لگښت شوی او په څومره وخت کې جوړ شوې دي.
د کلیو بیارغونې او پراختیا وزارت وايي، د دغه وزارت او همکارو موسسو له لوري د هېواد سلگونه کلیو کې یې د اوبو رسولو گڼې شبکې گټه اخیستنې ته سپارلې او لا هم په گڼو شبکو کار روان دی، چې ډېر ژر به بشپړې شي.
یادې شبکې د لمریزې برېښنا په مټ چلول کېږي، چې د کلیو خلکو ته د څښاک پاکې اوبه برابروي.