تقریبا هره ورځ په رسنیو کې د کابل ښاروالۍ له فعالیتونو خبرېږو؛ د هغوی فعالیتونه د ستاینې وړ دي؛ هغوی په وروستیو دریو کلونو کې ټوله هڅه کړې چې په ښار کې د مخکنیو زورواکو له لوري غصب شوې ځمکې بیرته راوګرځوي؛ ډیرې هغې ودانۍ یې ویجاړې کړي چې په غیر قانوني او غصب شویو ځمکو کې جوړې شوې وې.
څو ورځې وړاندې چې زه کابل ته تللی وم، نو ومې لیدل چې د ښار بڼه بدله شوې وه؛ ډیرې لارې چې مخکیني حکومت پر مهال بندې شوې وې، اوس بیرته د ترافیکو پر مخ خلاصې شوې دي؛ دغه راز، د ښار د سړکونو د پراختیا له پاره ډیر ګامونه اخیستل شوي وو.
له دهمزنګ څلور لارې څخه تر میرویس میدان (کوټ سنګي) پورې د سړک د پراخولو چارې روانې وې؛ د یاد سړک د پراخولو له پاره د نورو مهمو ودانیو تر څنګ د لوړو زدکړو وزارت او کابل پوهنتون څه برخه هم ویجاړه او د سړک برخه شوې وه.
د ښار د ښکلا له پاره یو شمېر څلور لارې په نوي شکل رغول شوي او ځینې نورې به راتلونکې ورغول شي.
دغه راز، د نوې کارتې (کارت نو) د سړک د پراخولو چارې هم نږدې راتلونکې کې پیلیدونکې وې؛ خلکو ته خبر ورکړل شوی وو او خلکو خپل مالونه له هغه ځایه لرې کول چې سړک پرې تېریږي.
دا دوه سیمې ما د بېلګې په ډول یادې کړې؛ له دې اخوا لسګونه نوي سړکونه یا جوړ شوي او یا پراخه شوي دي.
د خیرخانې د نوي پراخه شوي سړک ویډیوګانې خو هره ورځ په ټولنیزو رسنیو کې لاس په لاس کېږي.یو بل شی چې ما کابل کې ولید، هغه د کابل ښار د ځینو څلور لارو او واټونو د نومونو خپل اصلي حالت ته ورګرځول وو.
د بېلګې په ډول د مسعود څلور لارې بیرته خپل مخکیني نوم د عامې روغتیا څلور لارې او د عبدالحق څلور لارې بیرته د مکروریانو څلور لارې ته بدلول و.
د جمهوري دور په وخت کې په کابل کې د شر و فساد او نورو زورواکو له لوري ډیرې نارواوې وشوې چې له نیکه مرغه کابل ښاروالۍ یې اوس جبرانوي او کابل ښاریان د کابل ښاروالۍ له دغو کړنو ډیر راضي او خوشحاله ښکاري.
کابل ښاروالۍ داسې کارونه کوي چې راتلونکي کې به بیا هیڅ زورواکی د دولتي ځمکو غصب او ناقانونه ودانیو جوړولو او سړکونو بندولو ته زړه ښه نه کړي؛ د کابل ښاروالۍ کړنې تاریخ سازه دي.
دا هر څه د امارت د قاطعیت او د چا فرمایش ته غوږ نه نیولو له امله کیږي؛ په حکومتي چارو کې قاطعیت کول ډیر مهم دي او د امارت ډیر مخالفین هم د امارت په دغه کار اقرار کوي او مني یې.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.