یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د امنیت ګواښوونکي د شر او فساد هغه ډلې او ټپلې دي چې ګټې یې په امن او سوکالۍ کې له خطر سره مخ وي.د شر او فساد ډلې او ځينې نور بغاوتګر له هغې ورځې په چغو سر شول، له کله چې اسلامي امارت په هیواد واکمن شو او د چارو واګي یې په لاس کې واخیستل.
د بغاوتګرو خو په ناامنۍ کې خېټې غوړې وې، د نورو په مشورو به یې په هیواد کې بېلابیلې نامشروع کړنې ترسره کولې، د ملي ګټو پر ځای ورته خپلې ګټې مطرح وې.
دا چې یو شمېر د تېر نظام مسلکي غله لا اوس هم ځانونه د افغانانو اصلي مدافعین ګڼي، همدغو غلو په خپل وخت سره، له عام ولس څخه سرچپه پوستکی ویستی دی، له هرې ممکنې لارې یې په ولسونو ظلم او تېری کړی.
په دولتي او غیري دولتي اداراتو کې یې مقررۍ په روابطو او ضوابطو ترسره کېدلې، خېښي او خپلوي پکې پالل کېده، د همدې فاسدو او ناهله غلو له امله یو شمېر ځوانانو خپل تحصلي اسنادونه څیرې او وسوځول چې د دندې په مقابل کې ترې د رشوت غوښتنه کېده، که چېرې کوم چا د رشوت ورکولو وسه درلوده، که تحصلي اسناد یې درلودل او که نه، یوازې او یوازې به په دنده همغه کس وګمارل شو چې د رشوت ورکولو توان یې درلود.
نو له دې څخه څرګنده شوه چې د هیواد په ناامنۍ کې د ډېرو خېټورو غلو چې په ارامو او رشوت خورۍ یې خېټې له دوی یو متر لاندې ځوړندې وې، ګټې او شخصي بزنسونه یې روان وو؛ همدغو رشوت خورو د پیسو په مقابل کې تر ډېره امنیت ګواښه، د ترور او اختطاف ډلې یې جوړې کړې وې، وژنې او قتلونه یې په پټه او ښکاره ترسره کول.
هیڅ چا د دې ډلو او ټپلو په مقابل کې د غږ پورته کولو توان نه درلود چې زما حق تلف شوی، زه ناحقه زورول شوی یم، د کار په مقابل کې رانه د رشوت غوښتنه شوې؛ احیانًا که داسې کوم کس به پیدا شو، خپل غږ به یې اوچت کړ، بله ورځ به یې د کلي له مسجد څخه د جنازې اعلان اورېدل کېده او یابه یې جسد په جمعو او میاشتو لادرکه وو.
الحمدالله نن سبا د اسلامي او شرعي نظام له لوړپوړو چارواکو نیولی تر ټيټې کچې پورې د امنیت د تامین په هڅه کې دي، ترڅو هیوادوال د ارام او هوسا ژوند خواږه وڅکي، عوام هم د امنیت په ټينګښت کې له اسلامي امارت سره اوږه پراوږه ولاړ دي، یو ځای فعالیت کوي، چې د خلافو کارو او ورانکارو/شر او فساد ډلو مخه ونیسي چې د بیا ځل لپاره هیواد ناامنه نه شي.