پاکستان چې له ایجاد را وروسته یې په خپل څه باندې اویا کلن تاريخ کې، د انګرېزانو لخوا د خپلو موخو او اسلام ضد پروژو د تحقق په موخه کار کړی، په خپل تېر تاريخ کې د نن په شان داسې بد حالت نه و پرې راغلی.
د پاکستان په نوم جغرافیه تر بل هر وخت د نن په شان له شته سیاسي او اقتصادي بې ثباتۍ، د ميلياردونو ډالرو قرض او تر ټولو بد امنيتي وضعیت سره لاس او ګرېوان دی.
د مسؤليت په هره برخې کې یې ناکام سياسي او حکومتي چارواکي ورځ تر بلې د خپلې ماتې، له مسؤليتونو د تېښتې او پاکستاني ولس په سترګو کې د خاورې شیندلو په تکل پر افغانستان ناسم تورونه لګولي دي. که په پاکستان کې لاريون هم کېږي، نو دوی په مستقيم ډول د افغان کډوالو د شتون خبره په کې کوي، که چاودنه يا برید کېږي، هلته هم د خپلې کمزورۍ پړه پر افغانستان اچوي.
د پاکستان د لومړي وزير، د ارشد مشاور رانا ثناءالله تازه څرګندونې چې په افغانستان کې يې د بيا – بيا هوايي بريدونو خبره کړې ده، په سيستماتيکه توګه د هغې ماتې پټولو هڅه ده، کوم چې د تحريک طالبان پاکستان، بلوڅ بېلتون پالو او نورو ډلو سره یې په جګړه کې خوړلې ده.
ثناءالله پاکستاني ولس ته څرګندوي، چې د پاکستان ضد وسلوالې ډلې له افغانستانه راځي او هلته یې په هدف ګرځولو سره د خپلو خبرو او ادعاوو لپاره دلایل تراشي، خو پر افغان خاوره له ښکاره تېري وروسته معلومه شوه چې پاکستاني پوځیانو د تېر په څېر بيا هم معصوم ماشومان په افغان خاوره کې هدف ګرځولي وو، هغه ماشومان او کډوال کوم چې کابو يوه لسيزه وړاندې د همدې پوځ د ظلم او جبر په پايله کې د خپلو مېنو پرېښودلو ته اړ شوي وو او افغانستان ته يې پناه راوړې وه.
همدا راز ثناءالله هڅه کوي، د ټرمپ له راتګ وړاندې امريکايي پاليسي جوړوونکو ته وښيي، چې افغانستان د پاکستان ضد وسلوالو ډلو په خوندي پټنځای بدل شوی دی، تر څو د دغه وسلوالو ډلو په ضد له امریکا څخه مالي او نظامي ملاتړ ترلاسه کړي.
د شهباز شریف اوسني حکومت ته يوه مېاشت وړاندې زلمي خلیلزاد ور ياده کړې وه، چې عمران خان له زندانه راخوشي کړي؛ هغه عمران خان چې په خوشي کولو سره یې د شهباز شريف د حکومت عمر لنډېږي.
شهباز شریف د همدې وېرې او احتمالي سناریو له عملي کېدلو وړاندې، له تحريک انصاف ګوند سره د خبرو لپاره د دولت په کچه يوه ځانګړې مذاکراتي کمېټه وټاکل؛ له دې هم څرګندېږي چې شهباز شريف د عمران خان او ټرمپ د حکومت له احتمالي مداخلې وړاندې له عمران خان سره د اړيکو ښه کولو هڅه کوي.
خليلزاد همدا راز د نوي پاکستان په اړه خبرې کړې دي، هغه چې د رانا ثناءالله او د هغه په شان د نورو ډېرو سیاسیونو خوبونه او د پاکستاني ولس د تېر ايستلو لوبې ته به د پای ټکی کېږدي. دغه امريکايي ډيپلوماټ د پاکستان اوسني حالت ته د دريو شته فکټورونو په عینکو تحليل کړی دی او پايله یې داسې اعلان کړې چې د نوي پاکستان څرکونه ډېر دي. داسې احتمال هم شته چې د امريکا د اووه څلوېښتم ولسمشر له لوړې سره په آسيا کې د پاکستان په نوم جوړه شوې جغرافیه د نویو تحولاتو شاهده وي.
پاکستاني سیاستوالو په ټوليزه توګه په تېرو دريو کلنو کې هڅه وکړه، چې د خپلو ماتو او ناکامیو د پټولو په موخه د خپل بام ټوله واوره پر افغانستان ور واچوي، خو اوس داسې ښکاري چې د دوی ټولې هغه لارې چې دوی پرې د پاکستان ولس تېر ایسته، بې نتیجې شوې دي.
رانا ثناءالله د پاکستاني رژيم لخوا تېر کال د ژمي په يخ موسم کې، هلته د مېشتو افغان کډوالو د ایستلو لپاره هم همدا دليل کاروه، چې دوی د پاکستان په بې ثباتۍ کې ښکېل دي، خو نه تنها دا چې افغان کډوال په جګړو کې ښکېل نه وو، بلکې د هغوی له ایستلو سره د پاکستان امنيت د ښه والي په ځای لا پسې خراب شو.
ثناءالله او د پاکستاني رژيم چارواکي باید درک کړي، چې نور د پاکستان ولس په خپلو داسې بې باکه او بې سنده خبرو نشي غولولای او نه به هم د دوی دا کړنې کوم درد دواء کړي، بلکې لا به د خپلو ناسمو پاليسو له امله په راتلونکي کې تر دې د سختو ورځو شاهدان وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.