لوی کارونه همېشه د لوړو ذهنیتونو، لویو خلکو او ډېر کله د بېلابیلو فکرونو او استعدادونو په راټولېدو او یو ځای کېدو سره ترسره کېږي، په پایله کې یوې ښې نتیجې ته رسېږي. توپیر نه کوي که دغه راټولېدل او یو ځای کېدل د سپېڅلو، سالمو او ګټورو اهدافو لپاره وي، یا د شیطاني، بدو او شومو غوښتنو لپاره؛ پایله یې د دوی لپاره ښه وي.
د داسې یوې ټولګې تشکیل فرد او ټولي ته د دې کار په بدل کې په ورکول کېدونکې حق الزحمه پورې اړه لري. زموږ بحث د شر او فساد ډلو په اړه دی؛ هغه چې په تېرو وختونو کې د افغانستان د بیت المال په سخي دسترخوان راټول وو، تر خپل وسه پورې یې لوټ کړ، ویې خواړه او چور یې کړ.
د دې ډلو مشران چې هر یوه یې په افغانستان کې ځانګړی نوم، مقام او نفوذ درلود، خپلو ځانونو او خپلوانو ته د مال او شتمنۍ په راټولولو او پټولو کې متلي شوي دي، چې بیا یې له هېواد څخه تر تښتولو وروسته په خارج کې مصرفوي، د همدې لوټل شویو شتمنیو په مټ د افغانستان د سرپرست حکومت په ضد دریځ نیسي، بد یې وایي، تخریبوي یې او لویې – لویې ادعاوې کوي.
خو له دې سره – سره، یو څه چې ډېر مهم دي؛ د هغه ډلو یووالی او اړیکې ټینګې او ثابتې وي، د کومو چې ټولنیز تړاو د پاکو او روښانه اهدافو پر بنسټ جوړ شوی وي، داسې چې هدف یې دین او ملت ته خدمت وي.
تر هغې چې د شر او فساد ډلو لارویان د افغانستان په دسترخوان ناست وو، هر هغه څوک چې د دوی په څنګ کې درېدل او له هماغه پراخ او لوی دسترخوان څخه یې په ډېره سپین سترګۍ سره شتمني خوړل، په ښکاره له یو او بل سره متحد او یو ځای وو، هیڅ یوه یې له بل څخه کوم شکایت نه درلود، په دې فکر کې نه وو چې هغه بل څومره او څنګه یې اخلي!؟
خو اوس چې هغه فرصتونه له منځه تللي، هغه لوی دسترخوان ټول او د دې خلکو ډېره برخه له هېواد څخه تښتېدلې ده، یو په بل پسې د لویو او ملي غلاوو او خیانتونو د برملا کېدو نوبت راغلی دی. هر یو یې د خپلو ټیمونو، په ځانګړي ډول په لویانو او مشرانو، باندې د ډول ډول غلا، لوټ او چور تورونه پوري کوي.
د دې جنایتونو او خیانتونو د برملا کولو لامل هم دا دی، کومې پیسې چې پخوا په بې حسابه ډول دوی ته ورکول کیدې، اوس ېې سرچینه بند شوې ده، د شر او د فساد ډلو د ټیټې درجې غړي له وارخطایي سره مخ دي او لاسونه یې خالي شوي دي.
دوی په پټه خپلو مشرانو ته پیغامونه لېږلي دي، چې موږ پیسې او پانګې ته اړتیا لرو او د تېر وخت احسانات یې هم ور یاد کړي، خو کله چې له هغې خوا له منفي ځواب سره مخ شول، د یو او بل د پټو رازونو او د پردې شاته خبرو له افشاء کولو پرته یې بله لاره پیدا نه کړه.
اوس مهال په رسنیز بازار کې د همدې حقایقو، غلاوو او خیانتونو د برملا کېدو بازار ګرم دی او د همدوی په خپلو لاسونو افشاء کېږي.
د دې بدنامیو او افشاء ګیریو اصلي دلیل په یوه وخت کې، د پاکو نیتونو او شومو اهدافو نه یو ځای کېدل دي، هغه زړې اړیکې او یارانې ېې له منځه تللې او ددې لپاره هېڅ دلیل نشته چې د یوه بل د پټو رازونو ساتلو ته اړ شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.