ايران کې د دغه هېواد د حکومت پر ضد فعالې جیش العدل وسله والې ډلې په یوه لیکلې اعلامیه او ویډيو کې ایران کې بهرنیو او کورنیو “نوروز” لمانځونکو ګرځندویانو ته اخطار ورکړی، چې سیستان او بلوچستان کې امنیتي وضعیت خراب دی، احتياط دې وکړي او که په نښتو کې راګېر شول، له جیش العدل نه دې مرسته وغواړي، څه زیان به ور ونه رسوي.
د دې ډلې په اعلاميه کې همدا راز له ايراني پانګوالو او سیلانیانو غوښتل شوي چې، د مکران په نوم ساحلي سيمه کې پانګونه ونه کړي، کنه د دوی له سخت غبرګون سره به مخ شي او په وينا یې ياده سيمه د دوی ملکيت دی خو ايران ترې يرغمل کړې ده.
جيش العدل ډله شاوخوا پنځلس کاله وړاندې د ايران په بلوچستان ولايت کې د سني مذهبو وګړو د حق غوښتنې او په دوی د کېدونکو ظلمونو د مخینوي په موخه رامنځته شوې، چې اوس د ايران د حکومت پر وړاندې په لوی سرخوږي بدلېدونکې ده.