هندوکش غږ ته د خپلو سرچینو څخه د را رسېدلو تازه معلوماتو په اساس د مقاومت په نوم جبهې څخه د امرالله صالح د بېلېدونکې جبهې لپاره هڅې نورې هم چټکې شوې دي او په دې اړه تازه د تاجکستان سربيره په ايران کې هم پټ مجالس روان دي.
هندوکش غږ تازه مؤثق معلومات موندلي چې په ايران کې د نوې جبهې(روند سبز) لپاره د مقاومت جبهې له منځه د جلب او جذب لړۍ هم چټکه شوې او د مقاومت جبهې په ليکو کې د روند سبز حاميان مخ په زياتېدو دي.
څه موده وړاندې په تاجکستان کې د امرالله صالح او احمد مسعود تر منځ په يوه جلسه کې د نوې جبهې(روند سبز) په سر بحثونه په ناندريو او لفظي شخړو بدل شول، تر دې چې د احمد مسعود له لوري امرالله صالح ته د بې عقل، سپک او احمق په نوم خطاب وشو.
د يادونې وړ ده چې د مقاومت په نوم جبهې تر منځ له خارجي استخباراتي سازمانونو څخه د تر لاسه کيدونکو پيسو د ويش، امتيازاتو، موقفونو او انحصاري سياستونو په خاطر اختلافات مخ په زياتيدو دي، د دې اختلافاتو او انحصار ګريو له امله د مقاومت جبهې ځينې کسان آن د عيسويت دین منلو ته هم تيار شوي دي، ځينې د آزادي جبهې ته د تللو په لټه کې شوي او ځينې يې د جبهې د بېلېدو په فکر کې دي، کوم چې په اړه يې هندوکش غږ په خپل وخت مستند راپورونه نشر کړي دي.
