څلورمه برخه
د عامو خلکو د ذهنونو روښانولو لپاره له رسنیو څخه ګټه اخیستنه
په اوسنۍ پرمختللې او عصري نړۍ کې د معلوماتو او اړیکو خپرېدو سرعت ډېر لوړ او پیاوړی دی؛ لکه څنګه چې په نړۍ کې په لېرې پرتو سیمو کې پېښېدونکي حالات او پېښې په یوه لحظه او د ثانیې په کسر کې د نړۍ ټولو کونجونو ته خپرېږي، عامیږي او د اورېدونکو احساسات راپاروي.
د معلوماتو د خپرېدو له دې ګړندي سرعت او د بېلابېلو خبرونو له لوړ حجم سره، هم کولای شو خوشبینه واوسو او په اسانۍ او د ثانیې په کسر کې وروستي بدلونونه وڅارو او هم کولای شو بدبینه واوسو او دا وېره ولرو چې د مؤثقو او نامؤثقو معلوماتو د خپرولو په پراخه فضا کې، ډېره اسانه ده چې ژوند تخریب شي او عزتونه له منځه لاړ شي.
اوس موږ یو څه د رسنیو همدې مثبت او اسانتیا راوړونکي اړخ ته پام کوو او د دې سړې خو پیاوړې او اغېزناکې وسلې له بېساري ځواک څخه له هغه فکر سره د مقابلې او مبارزې لپاره کار اخلو چې د ملي یووالي په کلک دېوال کې د درز رامنځ ته کولو غوښتونکی دی او د افغانستان د پاک زړو خلکو په حق کې د هر ډول جنایت او جرم له ترسره کولو څخه هېڅ ډډه نه کوي.
له همدې امله، له بغاوتګرو سره د مقابلې او مبارزې یوه لاره د جمعي او عامه رسنیو له امکاناتو او ظرفیتونو څخه ګټه اخیستنه ده چې اوس یې د ښې او دقیقې ګټې اخیستنې فرصت د هر چا لپاره برابر دی او له دې څخه زیات، حکومت کولای شي له دې وسیلې څخه په ښه توګه او د خپلې ګټې لپاره ګټه واخلي او په تدبیر، هوښیارۍ او ډېر ظرافت سره له بغاوتګرو سره د مقابلې لپاره ګامونه پورته کړي.
په دې کې شک نشته چې په اوسنۍ زمانه کې په سیاسي مبارزو کې یوه قوي وسله له رسنیو څخه ښه او پر وخت ګټه اخیستنه او د معلوماتو د ترلاسه کولو او خپرولو لپاره د مناسب وخت رعایتول دي.
لکه څنګه چې بغاوتګر له هېواد څخه بهر د افغانستان او خیرخواه مسئولینو پر ضد د اوازو او درواغو په خپرولو او داسې نورو له لارو رسنیز اقدامات کوي او د عامو خلکو د ذهنونو تخریبولو او د افغانستان د شریف ملت پر ضد د مخالفت او محاذ جوړولو په هڅه کې دي، همداسې هم ډېره اسانه ده چې د دوی په ضد له دې برابرې شوې زمینې څخه ګټه واخلو او په هماغه غشي چې دوی یې غورځوي، له دوی سره سړه او رواني جګړه پیل کړو.
لکه څنګه چې موږ د رسنیو په چوکاټ کې ګورو، دا ډول خلک د ځوانانو ذهنونه پاروي او د ځینو موجوده ستونزو په برجسته کولو سره، په ټولو هغو مثبتو بدلونونو او تحولاتو باندې د پردې اچولو په لټه کې دي، چې په نږدې موده کې په افغانستان کې رامنځ ته شوي او خوشبینونکی رول لري.
له همدې امله، کولای شو د مسلکي او ماهرو اشخاصو په ګمارلو سره د رسنیو له ظرفیتونو څخه د هغوی پر ضد برنامې جوړې او اجرا کړو، د هغوی تخریبي رول بې اغېزې کړو او د هغوی هڅې په پیل کې له منځه یوسو.
ځکه لکه څنګه چې هغوی له دې تخریبوونکې او ډېر مخاطب لرونکې وسلې څخه د خپل ځان په ګټه او د خپل ځان لپاره د تبلیغاتو لپاره ګټه اخلي، تر دې هم زیات د هېواد خیرخواه مسئولین کولای شي له دې امکاناتو څخه د بغاوت کوونکو د شومو پلانونو د شنډولو لپاره ګټه واخلي او هماغه لږه هڅه یې هم په نطفه کې خنثی کړي.
نو له بغاوتګرو سره د اغېزمنې مقابلې په لاره کې دوهمه لاره د رسنیو له ظرفیتونو څخه سمه او پر وخت ګټه اخیستنه ده چې په دې اړه حکومت زیاتې سرچینې، آزاد لاس، ډېر باوري کسان او پراخ ظرفیت لري.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.