د بلوڅ ملي غورځنګ (BNM) مشر ډاکټر نسیم بلوچ پر افغانستان د پاکستان وروستي بریدونه او تېری په کلکه غندلی او دا یې د نړیوالو قوانینو سرغړونه او د افغان ولس د ازادۍ او عزت پر ضد عمل بللی دی.
ډاکټر بلوچ ویلي، پاکستان فکر کاوه چې ګواکې کابل به د اسلاماباد تر نفوذ لاندې راشي؛ خو افغان حکومت د خپل حاکمیت دفاع وکړه او د پاکستان هيلې یې شنډې کړې.
هغه وروستی کړکېچ د پاکستان د اوږدمهاله مداخلې پالیسۍ دوام بللی، چې موخه یې د افغانستان کمزوري کول او د پاکستان د پوځي تسلط پراخول دي.
نوموړي ټینګار کړی، چې افغان او بلوڅ ملتونه د ګډ تاریخ، جغرافیې او فرهنګ لرونکي دي او هېڅ بهرنی ځواک حق نه لري د دوی تر منځ دښمني خپره کړي.
ډاکټر بلوچ همدا راز له افغان ولس سره د خپل غورځنګ بشپړ یووالی اعلان کړی او دا پېښه یې د سیمې د یوې نوې تهاجمي ستراتیژۍ پیل ګڼلی دی.
هغه له نړیوالې ټولنې غوښتنه کړې، چې د افغانستان د حاکمیت د درناوي او د سیمې د سولې لپاره عملي ګامونه پورته کړي.