سپوتنیک خبر ورکړی، چې روسیو څېړونکو د مصنوعي ځیرکتیا (AI) یو نوی سیسټم جوړ کړی، چې د خطرناکو او وژونکو ساري ناروغیو د خپرېدو اټکل او مخنیوی کولی شي. دا سیسټم د هوايي شرایطو او طبي معلوماتو د ګډ تحلیل له لارې د احتمالي وباګانو په اړه مخکې له مخکې خبرداری ورکوي.
د سپوتنیک د راپور له مخې، دغه مصنوعي ځیرکتیايي ماډل د انګولايي څېړونکي، خواکیم تیموتئو، له لوري د مسکو د ارتباطاتو او انفورماتیک په تخنیکي پوهنتون کې جوړ شوی دی.
راپور زیاتوي، چې د دې پروګرام د جوړولو لپاره د ملاریا ناروغۍ اړوند معلومات کارول شوي او سیسټم کولی شي د هوا د بدلونونو او طبي معلوماتو په یوځای کولو سره د ساري ناروغیو د خپرېدو احتمال وارزوي او د مخنیوي لپاره یې وختي خبرداری وړاندې کړي.
د راپور له مخې، تمه ده دغه نوې ټکنالوژي د عامې روغتیا له ادارو سره د وباګانو د مدیریت، چټک غبرګون او د خطرناکو ناروغیو د خپرېدو د مخنیوي په برخه کې مهمه مرسته وکړي.