د ریاستالوزراء اقتصادي معاونیت په یوه خبرپاڼه کې ویلي، چې د ریاست الوزاء د اقتصادي مرستیال ملا عبدالغني برادر اخوند په مشرۍ د تدارکاتو کمېسیون نوبتي غونډه کې د ۳۴ پروژو د منظورۍ اړوند بحث شوی دی.
خبرپاڼه زیاتوي، چې د غونډې په پایله کې د شاوخوا ۱.۳ میلیارد افغانیو په ارزښت ۱۳ پروژې منظورې، په ۱۶ پروژو کې تعدیلونه تصویب، د یوې پروژې قرارداد لغوه او د څلورو نورو پروژو د تدارکاتي پروسو او قیمتونو د ارزونې لپاره ځانګړو کمېټو ته د څېړنې دنده سپارل شوې ده.
د خبرپاڼې په وینا، د منظور شویو پروژو په ډله کې د پکتیا ولایت د جانيخیلو ولسوالۍ د روغتون جوړول، په یو شمېر ولایتونو کې د مخابراتي خدمتونو پراختیا، د برښنا د لېږد او وېش پروژې او د کابل ښار د ځینو داخلي سړکونو جوړول او د پاتې چارو بشپړول شامل دي.
د خبرپاڼې د معلوماتو له مخې، یادې ټولې پروژې د افغان حکومت له بودجې تمویلېږي.