د بهرنیو چارو وزارت په یوه خبرپاڼه کې ویلي، چې د یاد وزارت مالي او اداري مرستیال دکتور محمد نعیم په کابل کې د جاپان له سفیر ماساموتو کینیچي سره کتلي دي.
په دې لیدنه کې د افغانستان او جاپان پر دوه اړخیزو اړیکو، ګډو ګټو او د همکاریو پر پراختیا خبرې شوې دي.
د جاپان سفیر د دواړو هېوادونو د اړیکو د لا پیاوړتیا هیله څرګنده کړې او په افغانستان کې یې د نشهيي توکو پر وړاندې د افغان حکومت مبارزه، د امنیتي وضعیت ښه والی او نور پرمختګونه ستایلي.
نوموړي همدارنګه د افغان حکومت او اروپایي ټولنې ترمنځ د بروکسل د غونډې هرکلی کړی.
د بهرنیو چارو وزارت مرستیال د جاپان له مثبت دریځه او له افغانانو سره د دغه هېواد له همکاریو مننه کړې او د متقابلو اړیکو د پراختیا پر دوام یې د ټینګار ترڅنګ دواړو لورو د ګډې همغږۍ لپاره د ناستو دوام مهم بللی.