راپورونه وايي، د پاکستان پوځي رژیم ادارو د رسنیو پر فعالیتونو د لا زیات کنټرول لپاره نوي مقررات نافذ کړي، چې د رسنیو او خبریالانو د فعالیتونو د لا سخت سانسور ښکارندويي کوي.
د نویو مقرراتو له مخې، ټول بهرني خبریالان او د بهرنیو رسنیو کارکوونکي مکلف دي، چې له اسلاماباد، لاهور او کراچۍ څخه بهر د هر ډول خبري پوښښ لپاره د پاکستان پوځي رژیم د اطلاعاتو او خپرونو وزارت ځانګړی اجازهلیک ترلاسه کړي.
د پاکستان پوځي رژیم د اطلاعاتو او خپرونو وزارت د «۲۰۲۶ کال د بهرنیو رسنیو د اسانتیاوو لارښوونې» تر سرلیک لاندې اعلان شویو اصولو له مخې، ټولې بهرنۍ رسنۍ، خبریالان، انځور اخیستونکي، سیمهییز همکاران او هغه پاکستاني وګړي چې له بهرنیو رسنیو سره کار کوي، باید د وزارت په رسمي پورټل کې ثبت شي او له پلازمېنې او لویو ښارونو څخه بهر د راپور جوړولو لپاره مخکې رسمي اجازه واخلي.
دغه محدودیتونه په ځانګړي ډول د پښتونخوا او بلوچستان امنیتي وضعیت ته په کتو وضع شوي، ځکه په دغو سیمو کې د پاکستاني پوځ او وسلهوالو خوځښتونو، په ځانګړي ډول د ټيټيپي او بلوڅ بېلتونپالو په پوځي رژیم بریدونه زیات شوي او د پوځ د تلفاتو راپورونه هم خپرېږي. اسلاماباد هڅه کوي د دغو سیمو خپلواک خبري پوښښ محدود کړي، ترڅو د جګړو او امنیتي وضعیت په اړه د معلوماتو خپرېدل تر خپل کنټرول لاندې وساتي.
دغه اقدام په داسې حال کې شوی، چې پاکستان کې د رسنیو د ازادۍ په اړه اندېښنې ورځ تر بلې زیاتېږي. تازه پاکستان پر الجزیرې هم محدودیتونه لګولي وو او څارونکي دا نوي مقررات د رسنیو د سانسور او د اطلاعاتو د جریان د لا سخت کنټرول یوه بله کړۍ بولي.