حسیب قوای مرکز، چې د تش په نوم مقاومت جبهې له مهمو قوماندانانو څخه بلل کېده، د سالنګ په مربوطاتو کې د افغان حکومت په ځانګړو عملیاتو کې ووژل شو.
د جمهوریت پر مهال د لوګر د ولایتي شورا رئیس حسیب ستانکزي ویلي، چې حسیب قوای مرکز له ۱۱ نورو کسانو سره سالنګ ته تللی و او د افغان حکومت له لوري پرې عملیات وشول.
د ستانکزي په وینا، له څه مودې راهیسې د تش په نوم مقاومت جبهې د پوځي مسؤول امیري، حسیب قوای مرکز او یو شمېر نورو قوماندانانو ترمنځ د تش په نوم جبهې له مشرتابه سره جدي اختلافات موجود وو.
ستانکزی وايي، د دغو اختلافاتو د حل لپاره د تېر جمهوریت د دفاع وزیر بسمالله محمدي په نوښت غونډه هم شوې وه، خو اختلافات هوار نه شول.
د نوموړي په ادعا، حسیب او ځینو نورو قوماندانانو د مقاومت جبهې د پرېښودو او له نورو تش په نوم خوځښتونو سره د خبرو د پیلولو پرېکړه کړې وه.
هغه زیاتوي، چې حسیب له پاکستانه افغانستان ته تر راتګ وروسته غوښتل د بغلان په مربوطاتو کې عملیات ترسره او د شمال لویه لار وتړي، خو دې هدف ته ونه رسېد.
د ستانکزي په باور، د وروستیو اختلافاتو له کبله دا احتمال هم شته، چې د حسیب او هغه د ملګرو د موقعیت معلومات افشا شوي وي.
بلخوا، خبریال او د تېر جمهوریت د امنیت شورا د سلاکار حمدالله محب سکرتر فضل ربي شینواري ویلي، چې د افغان حکومت د مخالفو ډلو ترمنځ د نفوذ او قدرت سیالۍ تر دې کچې رسېدلې، چې د ځینو جنګیالیو د موقعیت معلومات د پیسو او امتیازاتو په بدل کې افشا کېږي. شینواري حسیب قوای مرکز د همدې سیالیو «قرباني» بللی دی.