الجزیرې خبر ورکړی، چې د سوریې په پلازمېنه دمشق کې د چاودنې له امله لږ تر لږه ۹ کسان وژل شوي او ۲۲ نور ټپیان شوي دي.
د الجزیرې د راپور له مخې، چاودنه د دمشق د الحجاز سیمې په یوه کافه کې، د عدلیې ماڼۍ ته نږدې رامنځته شوې ده. او د پېښې ټپیان د سختو ټپونو د درمنلې لپاره روغتون ته لېږدول شوي دي.
الجزیرې د سوریې د روغتیايي او امنیتي چارواکو له قوله ویلي، لومړني معلومات ښيي، چې چاودنه د کافې دننه د ځای پر ځای شویو چاودېدونکو توکو له امله شوې ده. له پېښې وروسته امنیتي ځواکونو سیمه کلابنده کړې او د برید د څرنګوالي او عاملینو د پېژندلو لپاره یې پلټنې پیل کړې دي.
تر اوسه کومې ډلې د دې برید مسؤلیت نه دی منلی، خو دا پېښه په داسې حال کې رامنځته شوې چې سوریه لا هم له امنیتي ننګونو او د تاوتریخوالي له جلا جلا پېښو سره مخ ده.