نړیوالو رسنیو راپور ورکړی، چې د امریکا او ایران ترمنځ د هوکړې له اعلان وروسته په نړیوالو بازارونو کې د نفتو بیې د پام وړ راټیټې شوې دي.
د راپورونو له مخې، د برېنټ نفتو بیه ۳،۹ سلنه کمه شوې او د هر بېرل قیمت یې ۸۴ ډالرو ته رسېدلی دی. همداراز د امریکا خام نفت ۴،۹ سلنه ارزانه شوي او د هر بېرل بیه یې شاوخوا ۸۱ ډالرو ته ښکته شوې ده.
اقتصادي کارپوهان وایي، د هرمز تنګي بیا پرانیستل او د نفتو د لېږدوونکو بېړیو د عادي تګ راتګ بیا پیل کېدل کولای شي نړیوالو بازارونو ته د نفتو عرضه زیاته کړي او د بیو د لوړېدو فشار راکم کړي.