د عدالت نړیوالې محکمې په فلسطیني سیمو کې د اسرائیلو حضور ناقانونه بللی دی او د ژر تر ژره د پای ته رسېدو غوښتنه یې کړې ده.
یادې محکمې اعلان کړی، چې په فلسطیني سیمو کې د اسرائیل حضور ناقانوني دی او باید ژر تر ژره پای ته ورسېږي.
د عدالت نړیوالې محکمې وايي، اسرائیل د یوه اشغالگر هېواد په توگه په لوېدیځه غاړه او د بیت المقدس په ختیځه برخه کې له خپلې خاورې سره د فلسطیني ځمکو د یوځای کولو، په دې سیمو کې د دایمي کنټرول او د یهودي مېشتځایونو د جوړولو لپاره له خپل ځواک څخه کار اخلي.
یادې محکمې په خپل بیان کې ویلي، د فلسطین په نیول شوو سیمو کې د اسرائیل شتون ناقانونی دی او باید ژر تر ژره پای ته ورسېږي.
د عدالت نړیوالې محکمې د قاضیانو د پینځلس کسیزې ډلې مشر لبناني حقوق پوه نواف السالم ویلي، د قاضیانو پلاوی دې نتیجې ته رسېدلی چې په لوېدیځه غاړه او د بیت المقدس په ختیځ کې د یهودانو استوگنول او د دغه هېواد په ختیځ کې یهودي مېشتځایونه د جینیوا د څلورم کنوانسیون د ۴۹ مادې سرغړونه کوي.
د السالم په خبره، د جنیوا د څلورم کنوانسیون ۴۹ ماده په نیول شوو سیمو کې د “جبري انتقال او اخراج” مسئلې ته ځانگړې شوې چې په یوه برخه کې یې راغلي چې “نیواکگر حکومت نه شي کولی خپل نفوس یا د هغه یوه برخه هغو ځمکو ته انتقال کړي چې اشغال کړې یې دي.
یادې محکمې همدارنگه ویلي، اسرائیل باید د دوی د اشغال له امله اوښتي زیانونه هم جبران کړي.: «د ملگرو ملتونو عالي محکمې له نولس سوه اووه شپیتم کال راهیسې د اسرائیلو لخوا د فلسطیني ځمکو د اشغال په تړاو خپله پرېکړه کې اسرائیلو ته ویلي چې باید لوېدیځه غاړه او ختیځ بیت المقدس کې د مېشتونې فعالیتونه ودروي او په دغو سیمو او غزه کې خپل ناقانونه حضور ژر تر ژره پای ته ورسوي.»
د عدالت نړیوالې محکمې د بیان له مخې، اسرائیلو په همدې موده کې د فلسطین طبیعي زېرمې هم کارولې او هم یې د خپلواکۍ حق هم ترې اخیستی او د دې غرامت باید هم ورکړي.
صهیونیستي رژیم د ۱۹۶۷ز کال راهیسې په لوېدیځه غاړه او بیت المقدس کې د ۷سوه زره یهودانو لپاره ۱۶۰ ښارگوټي رغولي دي او یهودان یې پکې مېشت کړي دي.
د فلسطین د بهرنیو چارو وزارت د عدالت نړیوالې محکمې اوسنۍ پرېکړه ستایلې ده او اسرائیلو یې په توکموژنه تورن کړي دي.
د عدالت نړیوالې محکمې اوسنۍ پرېکړه له هغې قضیې جلا ده، چې سوېلي افریقا اسرائیل په غزه کې د فلسطینیانو په ټولوژنه تورن کړي دي.
