لیکوال: علي حیدر شاهین
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د دې لیکنې په لومړۍ برخه کې مو د مقاومت د جبهې (د شر او فساد ډلې) د ایماني تشخص په اړه درته ولیکل، چې دا ډله د غربي بادارانو له ملاتړ پرته ثبات نه لري.
د دې جبهې موجودیت په افغانستان کې لاس ته راغلی ثبات او امنیت یو ځل بیا د لا زیاتې بې ثباتۍ او ناامنۍ پر لوري بیایي؛ د دې جبهې بقاء او ژوندي پاتې کېدل افغانستان د غربي تابه په لور سوق کوي.
په افغانستان کې د امريکا او لوېديځو هېوادونو آرمان بيا راژوندي کول د مقاومت د جبهې (د شر او فساد ډلې) په ورسته رسۍ پورې تړلی دی.
د مقاومت جبهه(د شر او فساد ډله) په افغانستان کې د مذهبي بې ثباتۍ لپاره د غربي کفارو پاتې هیله ده.
د مقاومت د جبهې(د شر او فساد ډلې) شتون په افغانستان کې دینداري کمزورې او غربپالنه پیاوړې کوي، یا په بل عبارت امریکايي اسلام ژوندی کوي.
له همدې امله امریکا او اروپا له خپل مالي او پوځي ځواک سره د دې ډلې تر څنګ ولاړ دي؛ د دې جبهې د چارواکو د څرګندونو له مخې ډېر داسې شواهد شته، دلته ېې د بېلګې په توګه یادؤنه کوو:
علي میثم نظري د ۱۴۰۲ هـ. ش د جدي ۲۲مه په خپله «ایکس» پاڼه کې لیکلي وو چې د مقاومت جبهه له هغه سیاسي، مالي او اخلاقي ملاتړ څخه مننه کوي چې د ۲۰۲۱ کال له آگسټ وروسته یې د امریکا د متحده ایالاتو په کانګرس کې د خپلو ښو دوستانو لخوا ترلاسه کړی دی.
الله تعالی د سورة النساء په ۱۴۴ ایت کې خبرداری ورکوي، هفه د مقاومت جبهې په نوم پېژندل شوي مسلمانان(د شر او فساد ډلې) چې له کفارو سره دوستي کوي، په حقیقت کې له الله تعالی سره په ټکر کې دي او دوی د خپل ځان په وړاندې یو ښکاره دلیل جوړ کړی.
د الله له دښمنانو او ظلم کوونکو سره دوستي کول ګناه ده؛ الله تعالی د سورة المائده، په ۸۰ نمبر ایت کې فرمایي:«تَرَى کَثِیرًا مِّنْهُمْ یَتَوَلَّوْنَ الَّذِینَ کَفَرُواْ لَبِئْسَ مَا قَدَّمَتْ لَهُمْ أَنفُسُهُمْ أَن سَخِطَ اللّهُ عَلَیْهِمْ وَفِی الْعَذَابِ هُمْ خَالِدُونَ».
دا ایت د یهودیانو په اړه دی، خو د ټولو هغو کسانو لپاره چې د یوه اللهي دین د پیروۍ ادعا کوي، شاملېږي؛که د مؤمنانو پر ځای له کفارو سره دوستي وکړي، مسلمانانو ته هم شامل دی.
الله تعالی وايي: تاسو ډېری بني اسرائیل ګورئ چې له کافرانو سره دوستي کوي، دا به یقیناً د دوی د آخرت لپاره بده توښه وي چې تر ځانونو وړاندې یې لېږي؛ له کافر سره دوستي د مجازاتو سبب کېږي؛ دا د الله قهر راولي؛ او دا کسان به همېشه په عذاب کې وي.
د قرآن په صریح نص کې د الله حکم دا دی چې مسلمان باید له کفارو سره دوستي ونه کړي، حتی که هغه کافر پلار، ورور، زوی یا نږدې خپلوان هم وي؛ که کافر حربي وي، نو دا حکم نور هم شدت مومي.
الله تعالی د سورة مجادلې به ۲۲ نمبر آیت کې وايي:«لا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ».
ژباړه: ته به داسې قوم(مسلمانان) ونه مومې چې په الله او د آخرت په ورځ دې ایمان ولري او له هغو کسانو سره دې هم دوستي وکړي چې له الله او د هغه له رسول سره مخالفت کوي، که څه هم دا کسان د دوی پلرونه، زامن، وروڼه یا قوم هم وي.
پورتنی ایت د دې خطاب کوي چې که کفار نږدې خپلوان هم وي، له هغوی سره باید دوستي ونه شي؛ د مقاومت جبهه(د شر او فساد ډله) نه یوازې له کفارو سره دوستانه اړیکې لري، بلکې کفار او د لوېدیځې نړۍ دولتونه د دوی هیلې، ملاتړي مټې او بازو دي.
مسلمانو لوستونکو! اوس چې تاسو د دې آیاتو له مخې د مقاومت جبهې حکم درک کړ، قضاوت پر تاسو.
ادامه لري…
