له پېښو سره د مبارزې آمادګۍ ادارې مرستیال ویاند، تاج محمد همت وايي، چې د چنګاښ میاشتې له ۲۹مې څخه د زمري تر ۴مې نېټې پورې په ۱۵ ولایتونو کې د سختو بارانونو، توپانونو او سېلابونو له امله ۳۴ کسان شهیدان، ۲۹ نور ټپیان او ۴۴۶۲ کورنۍ زیانمنې شوې دي.
نوموړي د یوه ویډیويي پیغام له لارې ویلي، چې په کابل، پروان، کاپیسا، پنجشېر، پکتیا، پکتیکا، غزني، خوست، لوګر، میدان وردګ، زابل، بدخشان، ننګرهار، لغمان او نورستان ولایتونو کې ۲۶۶ کورونه په بشپړ ډول، ۸۱۷ نور په نیمه ډول ویجاړ شوي او ۲۳۲ کورنۍ بېځایه شوې دي.
د هغه په وینا، سېلابونو ۱۳۷ هټۍ، ۲۲۲ د اوبو څاګانې، ۲۸ کیلومتره سړکونه، ۱۵۰ د اوبو شبکې، ۲۲ د برېښنا شبکې او ۳۴ پلونه او پلچکونه هم ویجاړ کړي دي. همدارنګه ۲۶۶ څاروي، د ۷۲۳۳ جریبه کرنیزو ځمکو حاصلات، د ۸۹۵ جریبه باغونو حاصلات، ۷۴۱۰ ونې، ۹۱ تختې سولرونه او ۳۹ عرادې وسایط هم له منځه تللي دي.