له ارګ څخه په خپره شوې خبرپاڼه کې راغلي، چې د ریاستالوزراء اقتصادي مرستیال، ملا عبدالغني برادر اخوند، د ازبکستان د لومړي وزیر له مرستیال جمشید خواجهیف سره په لیدنه کې د سوداګرۍ، پانګونې او ترانزیټي همکاریو پر پراختیا خبرې وکړې.
ملا عبدالغني برادر له ازبکستان غوښتي، چې د افغان صادراتو او ترانزیټ پر وړاندې شته خنډونه لرې، د صادراتو لپاره اسانتیاوې زیاتې او افغانانو ته د ویزو ورکړه اسانه کړي.
جمشید خواجهیف ویلي، د افغانستان او ازبکستان ترمنځ د سوداګرۍ کچه ۱.۶ میلیارد ډالرو ته رسېدلې او ازبکستان چمتو دی چې په افغانستان کې روانې پروژې چټکې، په کانونو کې پانګونه وکړي، د افغانستان د غوښې او پنبې واردات زیات کړي او په حیرتان کې د زینک ډبرو د پروسس لپاره د ۵۰ میلیون ډالرو په ارزښت فابریکه جوړه کړي.