لیکوال: محمد فیصل
دا څلورم ځل دی چې د اتریش مرکز ویانا کې د ناملي او بې مقاومته جبهې ځینې بګیلان راټولېږي.
هغوی ځانونه ډير ملي ملي کوي، خو پکې د تش په نوم افغانانو او د یو ډیر کوچني اقلیت ځینې په اصطلاح استازي راټول شوي دي؛ هغه اقلیت چې تر ډیره د امریکا او اروپا په کمپونو کې میشت دی او خوراک يې سوسیال/بینیفټ دی.
ناملي جبهه له تېرو دریو کلونو راهیسې په اروپا کې سرګردانه ګرځي او خواري کوي چې لکه د تیر ځل په څیر دا ځل هم کوم بهرنی ملاتړی ومومي او افغانستان ته جګړه راوړي، خو تر دې دمه یې کوم سپانسر موندلی نه دی.
هغه کسان چې د ویانا ناسته کې يې ګډون کړی، ټول يې په تیرو دریو لسیزو کې په یو نه يو ډول فساد او وطن ورانونې کې ښکیل دي؛ د ځینو خو ان پلرونو هم د دې وطن ویجاړی کې رول درلود.
احمد مسعود چې د دغو مفسدینو مشر دی، پلار يې احمد شاه مسعود له روسانو سره پروتوکول او سوله کړې وه؛ احمد شاه مسعود په کورنیو جګړو کې له پرچمیانو سره لاس یو او وطن يې لوټې لوټې کړ چې پای یې طالبانو لمن ورټوله کړه او افغانستان یې د هغه له شر و فساده وژغوره.
د ننګرهار مخکیني قومندان حضرت علي هم په دغه غونډه کې ګډون کړی. دا هغه مفسد، غاصب او له ملي شتمنیو ناوړه استفاده کوونکی حضرت علي دی چې د کور جوړولو له پاره يې خښتې په چورلکه کې وړلې.
دا کسان مشت نمونه يې خروار و چې موږ یاد کړل؛ هلته ناست کسان ټول په فساد کې ښکیل وو؛ دوی په ولس کې ځای نه لري، که لرلی يې نو نن به د ولس تر څنګ ناست وو.
هیڅ افغان له وطنه د دوی په وتلو خپه نه دی، بلکې ولس خوشاله دی، هغه مفسدین چې شل کاله يې ولس وزبیښه، اوس په اروپا او امریکا کې سرګردانه ګرځي، خو هیڅوک يې کیسه کې نه دي.
دا څلورم ځل دی چې هغوی په ویانا کې راټولیږي، خو رسنۍ چندان پوښښ نه ورکوي؛ نړۍ هم شا ور اړولې او خریدار نه لري.
نړۍ پوهېږي چې دغه مفسدین د افغانانو درد دوا کولی نه شي، نړۍ پرې اعتبار او ملاتړ یې نه کوي، ځکه پوهیږي چې له طالب سره نه کيږي؛ طالب د نظامي تر څنګ په سیاسي ډګر کې هم دغو بګیلانو ته ماته ورکړې او سیاسي موقف يې ترې نیولی دی.
نړۍ پوهېږي چې د افغانستان په تاریخ کې له دغو خلکو لوی مفسدین تیر شوي نه دي او افغانان هم له دوی څخه ډیره کرکه لري، نو ځکه نه غواړي ملاتړ يې وکړي.
دوی سرګردانه او لالهانده دي، منډې ترړې يې کومه پایله نه لري؛ یوازې مصرفونه کوي او عکسونه اخلي، په دریو کلونو کې له راټولېدو، چای او ډوډۍ خوړلو او تشو اعلامیو خپرولو پرته بل هېڅ نه لري.
