د امریکا ولسمشر ډونالډ ټرمپ ادعا کړې چې ایران د تېرو څو میاشتو په ترڅ کې خپل ډېری پوځي ځواک له لاسه ورکړی او د دغه هېواد اټومي او پوځي تاسیسات، په ځانګړي ډول د نطنز ترڅنګ د «پیکاکس» غر، د امریکا تر نږدې څار لاندې دي.
ټرمپ ویلي، د امریکا په ځايي وخت د دوشنبې او سېشنبې په ورځو کې به پر ایران سخت بریدونه ترسره شي او امکان شته چې د نطنز د یورانیمو غني کولو تاسیساتو ته نږدې د «پیکاکس» غر هم په نښه شي.
رویټرز د نوموړي له قوله ویلي «موږ پیکاکس غر له نږدې څارو، هلته هېڅ فعالیت نه وینو او د ایران اټومي وضعیت ښه نه دی.»
هغه د ایران د پوځي وضعیت په اړه هم ویلي، چې دغه هېواد څلور میاشتې وړاندې په منځني ختیځ کې له ځواکمنو پوځونو څخه و، خو اوس یې د ده په وینا، سمندري ځواک له منځه تللی، ۱۵۹ بېړۍ او ۲۳۰ جنګي الوتکې یې له منځه وړل شوې، د هوايي دفاع او رادارونو ډېری سیستمونه یې له منځه تللي او د پوځي مشرتابه د لومړۍ او دویمې کچې ټول مشران وژل شوي دي.
ټرمپ زیاته کړې چې ایران نور د پخوا په څېر پوځي وړتیا نه لري.