د ریاست الوزراء اقتصادي مرستیال ملا عبدالغني برادر د نیمروز د علماوو شورا له غړو سره لیدلي او د یاد ولایت ستونزې یې له نږدې اورېدلې دي.
له اقتصادي مرستیال دفتر څخه په خپره شوې خبرپاڼه کې ویل شوي، په دې لیدنه کې د نیمروز د علماوو شورا د غړو سربېره د بهرنیو چارو، د مخابراتو او معلوماتي ټکنالوژۍ، د اوبو او انرژۍوزیرانو او د برېښنا شرکت رئیس هم حاضر وو.
د نیمروز د علماوو شورا غړو ویلي، د نیمروز ولس په خپل ټول توان سره په هر حالت کې د افغانستان اسلامي امارت څخه اطاعت او ملاتړ کوي.
دوی د نیمروز مرکز زرنج سربېره لرې پرتو ولسوالیو ته د برېښنا رسول، د څښاک پاکو اوبو ته لاسرسی، په زرنج کې د مخابراتي شبکو تقویه او لرې پرتو سیمو ته د مخابراتي شبکو پراختیا، د کرنې لپاره د ضرورت وړ اوبو برابرول او سرحدي ستونزو ته یې د رسېدنې ترڅنگ ځینې نورې ستونزې هم د ریاست الوزراء له اقتصادي مرستیال سره شریکې کړې.
اقتصادي مرستیال ویلي، اوسمهال په هېواد کې په مختلفو سکټورونو کې پروژې پیل او د پخوا په پرتله هېوادوالو ته د ژوند ډېرې اسانتیاوې برابرې شوې دي.:«له څه باندې څلور لسیزو وروسته د هېواد د آبادۍ فرصت برابر شوی خو ډېرې ستونزې په میراث را پاتې دي چې ټولو ته رسېدنه وخت او امکاناتو ته اړتیا لري، اسلامي امارت له خپلو هېوادوالو سره ژمنه کوي چې د دوی لومړیتوبونو ته په کتو به په تدریج سره ټولې ستونزې حل شي.»
نوموړي د نیمروز د علماوو شورا غړو له لوري شریکې شوې ستونزې اړوند وزارتونو او ادارو ته راجع کړې او له هغوی څخه یې غوښتي چې د شته امکاناتو څخه دې په گټه اخیستنې د یاد ولایت ستونزو ته رسېدنه وشي.
