لیکوال: عادل افغان
د ګڼو بهرنیو رسنیو د سر موضوع بیا هم د داعش فتنه ګرې ډلې لپاره د امریکا پر تبلیغاتو راڅرخېږي.
تازه د امریکا د سولې په نوم انستیتیوت له حقیقت لېرې ادعا کړې او ویلي یې دي چې د داعش خراسان څانګه په افغانستان کې په چټکۍ سره د پراخېدو په حال کې ده. یادې سرچینې خبرداری ورکړی، چې که د دې ډلې مخه ونه نیول شي، د نړۍ امنیت ګواښلی شي.
دا د داعش فتنهګرې ډلې لپاره د امریکايي ادارو د سیستماتیکو تبلیغاتو لړۍ ده، خو پوښتنه دا ده چې امریکا ولې دې چارې ته کار ویلی دی او اصلي حقیقت څه دی؟ امریکا او متحدینو یې په ۲۰۱۴ کال کې په عراق او سوریې کې د داعش په نوم د بدنامې او اسلام ضد ډلې په رامنځته کولو سره هڅه کوله پیل کړه، چې په دې ډول له یوې خوا خپلې ګټې خوندي کړي او له بلې خوا په اسلامي نړۍ کې راټوکېدلي نهضتونه بدنام کړي. پیل یې له عراق او سوریې وکړ، هلته یې چې ګټې خوندي شوې، د همدې بدنامې ډلې د ریښو د غځولو لپاره یې هڅه پیل کړه.
افغانستان چې تېرې دوې لسیزې د امریکا تر اشغال لاندې و، د همدې پروژې د تطبیق لپاره یې پکې هڅه پیل کړه، خو ډېر ژر دغه پروژه او پلان رسوا او د افغانانو د کلک مخالفت او د اسلامي امارت د جدیت له کبله یې دا پروژه ناکامه شوه.
که څه هم د امریکا په ملاتړ دې ډلې په پیل کې ستر وحشتونه وکړل، خلک او قومي مشران یې پر بمونو کېنول، له ځینو یې سرونه پرې کړل او په ښارونو کې یې هم د ګڼې ګوڼې پر ځایونو بریدونه وکړل، روغتونه، ښوونځي، ورزشي کلبونه او ان د جنازې مراسم یې په نښه کړل، خو له دې ټولو وحشتونو او جنایتونو سره سره، د امریکا په لاس جوړه شوې دا بدنامه ډله ناکامه او ريښې یې په وچېدو شوې، تر دې چې په افغانستان کې د امریکايي اشغال په ټولېدو سره د دې ډلې ټغر هم ټول شو.
امریکا بیا هم د سیمې د استخباراتي شبکو او نورو نیابتي ډلو په مرسته، هڅه وکړه چې په افغانستان کې خونړي بریدونه وکړي، خلک ووېروي، د اسلامي امارت واکمني پرې وننګوي او دغه راز نړیوالو ته دا وښيي چې افغانستان د دوی لپاره ګواښ دی، دې موخې ته د رسېدو لپاره امریکا او متحدینو یې خپل ټول امکانات وکارول، خو بیا هم ناکام شول.
بالاخره دې ته اړ شول، چې د دې شریرې ډلې پاتې شوني له افغانستانه وباسي او د پاکستان په یو شمېر سیمو او دغه راز قبایلو کې یې مېشت کړي. د دې ډلې اکثریت غړي هم د منځنۍ اسیا د هېوادونو اتباع دي، لویه برخه یې د تاجکستان اوسېدونکي دي.
په دې وروستیو کې په ایران او مسکو کې د دې بریدونو شواهدو وښوده چې په دغه ډول بریدونو کې هېڅ افغان اتباع ګډون نه درلود نه یې هم له افغانستان سره کومه اړیکه درلوده، بلکې برعکس ټول غړي یې بهرنیان وو او دغه بریدونه یې هم له بهره تظیم کړي وو، خو له دې ټولو شواهدو او ثبتونو سره سره، امریکا بیا هم په ډېره سپین سترګۍ سره هڅه وکړه، چې دغه بریدونه پر افغانستان او افغانانو پورې وتړي، خو هغه چې وايي لمر پر دوو ګوتو نه پټېږي، دا حقیقت هم د لمر په څېر روښانه و او د امریکا ټولو امکاناتو، تبلیغاتي دستګاه او استخباراتي شبکو ونه شو کولی چې دا حقیقت بدل کړي.
اوس هم چې د داعش په نوم فتنه ګره ډله په افغانستان کې په شدت سره ځپل شوې، ريښې یې دلته وچې شوې او ټغر یې ټول شول او اوس د افغانستان له پولو بهر خپل جلب او جذب کوي، هلته پټنځایونه لري، روزنیز مرکزونه لري او له هغو ځایونو پر نورو اهدافو بریدونه کوي، امریکا او د سیمې استخبارتي چوکره ګان یې له دې ټولو واقعیتونو سره سره، بیا هم هڅه کوي. چې دا شرمېدلې او فتنه ګره پدیده پر افغانستان پورې وتړي.
خو له دې ټولو تبلیغاتو او تورونو سره سره، حقیقت ټولو ته معلوم دی، د افغانستان اوسنی حکومت د داعش فتنهګرو پر وړاندې تر ټولو جدي پالیسي لري، هر ځای یې ځپلي او دوی ته هېڅ ځای د سر پورته کولو اجازه نه ورکوي. تر څنګ یې عام افغانان هم له دې پلیتې او بدنامې ډلې بده وړي او سخت مخالفت یې کوي.
امریکا که هر څومره د خپلو ګټو او د افغانستان د اوسني نظام د بدنامولو په خاطر دې فتنهګرې ډلې ته تبلیغات وکړي، پایله یې ناکامه او رسوايي ده. نه په نړۍ دا شی ومني او نه به هم په افغانستان کې شته واقعیتونه بدل کړي.
حقیقت دا دی چې داعش په افغانستان کې سخت ځپل شوې، ریښې یې وچې شوي او ټغر یې ټول شوی دی، اوس که په افغانستان او یا هم د سیمې په کوم هېواد کې د دې ډلې له ادرسه کوم برید کېږي، ريښې یې باید له افغانستانه د باندې د امریکايي چوکره ګانو تر کنټرول لاندې سیمو کې ولټول شي.
