په قرغیزستان کې د افغانستان سفارت خبر ورکړی، چې بېشکک ښار کې د افغان–قرغیز سوداګریز فورم په ناسته کې د دواړو هېوادونو ترمنځ د ګډې سوداګریزې شورا د جوړولو په اړه هوکړه شوې ده.
یاده شورا به د دواړو هېوادونو د سوداګرو ترمنځ د مستقیمو اړیکو د پیاوړتیا، ګډو نوښتونو د همغږۍ او اقتصادي پروژو د ودې او ملاتړ په برخو فعالیت کوي.
د خبرپاڼې له مخې، په دغه فورم کې د افغانستان او قرغیزستان د دولتي ادارو چارواکو، د سوداګرۍ خونو غړو او د خصوصي سکتور استازو ګډون کړی و.
په ناسته کې په قرغیزستان کې د افغان سفارت سرپرست، مولوي عبدالشکور حقاني ویلي، چې د دواړو هېوادونو ترمنځ د سوداګرۍ، اقتصاد، پانګونې او ټرانزیټ په برخو کې پراخ ظرفیت موجود دی.
هغه ټینګار کړی، چې د سوداګریزو اړیکو پیاوړتیا د دواړو هېوادونو په ګټه ده.