د افغان حکومت ویاند، مولوي ذبیح الله مجاهد «حکومت د رسنیو په هنداره کې» برنامې د پرانیستې په مراسمو کې وویل، رسنۍ مهم مسوولیت لري، چې د حکومت د رسنیو په مرکز کې وړاندې کېدونکي معلومات او فعالیتونه په پراخه او مسلکي بڼه منعکس کړي. هغه ټینګار وکړ چې د دغو موضوعاتو په اړه باید تحلیلونه، څېړنیز راپورونه او ځانګړې برنامې جوړې شي، ترڅو د دښمن تبلیغات بېاغېزې او په هېواد کې د امید او باور فضا پیاوړې شي.
نوموړي وویل، په اوسنۍ نړۍ کې په بېلابېلو برخو کې روانې جګړې د خلکو د اندېښنې او ناهیلۍ لامل شوې دي، له همدې امله رسنۍ باید د کره معلوماتو په خپرولو سره خلکو ته ډاډ او اطمینان ورکړي.
مولوي ذبیح الله مجاهد زیاته کړه، که څه هم هر نظام ستونزې او نیمګړتیاوې لري، خو ترڅنګ یې مهمې لاسته راوړنې هم لري. هغه وویل، افغان حکومت د موجودو ستونزو د حل او د نیمګړتیاوو د له منځه وړلو لپاره هڅې روانې ساتلې دي او رسنۍ باید د افغان حکومت د اصلاحاتو او پرمختګ اراده په متوازن او مسوولانه ډول خلکو ته ورسوي، تر څو د ناسمو تبلیغاتو اغېز کم او عامه باور لا پیاوړی شي.