د امربالمعروف، نهې عن المنکر او شکایتونو اورېدلو وزارت وایي، د غزني ولایت محتسبینو د مېرمنو حقونو ته په ژمنتیا د دې ولایت په قره باغ او اجرستان ولسوالیو کې دوه مېرمنې له اجباري نکاح څخه وژغورلې.
وزارت زیاتوي، یادې مېرمنې د ناوړه دودونو او زیاتو پیسو په بدل کې د هغوی له خوښې پرته په نکاح ورکول کېدلې.
ورته مهال ځایي اوسېدونکو په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایلي او ویلي یې دي، چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
د امر بالمعروف، نهې عنالمنکر او شکایتونو اورېدلو وزارت ډاډ ورکړی، چې د مېرمنو د حقونو خوندیتوب ورته لومړیتوب لري او هېڅ چاته به اجازه ورنه کړي، څو د مېرمنو حقونه تر پښو لاندې کړي.