د امر بالمعروف او نهې عن المنکر وزارت وياند سيف خيبر، هندوکش غږ سره په خبرو کې وويل، چې د دې وزارت محتسبينو په تېرو پنځه کلونو کې د خرافاتو د مخنيوي برخې د هڅو په لړ کې له ۸ زرو ډېر جادوګران او کوډګران نيولي دي.
ښاغلی خيبر زیاتوي، چې د معروفاتو د اقامې، د اسلامي ارزښتونو ساتنې، د سیرت او صورت جوړونې، د اخلاقي مفاسدو د مخنیوي، د لمونځونو د ښه اقامې، د بدچلندونو د مخنیوي او د دیني دعوت د عامولو په برخه کې هم پراخ فعالیتونه شوي دي.
هغه ويلي، چې په همدې موده کې د خلکو ۶۰ زره شکایتونه هم اورېدلي او ورته رسېدنه شوې ده.
د منکراتو د ازالې په برخه کې د سود، اخلاقي فساد، فحشا، نامناسبو لباسونو، په رسنیز ډګر کې د نامناسبو فعالیتونو او د ځوانانو د ناوړه کړنو، لکه نشهيي توکو، د والدینو نافرمانۍ او نورو بدو کړنو د مخنیوي لپاره هم اقدامات ترسره شوي دي.
سيف خيبر همدا راز وايي، چې د فکري او عقیدوي انحرافاتو د خپرولو ګڼ مرکزونه هم په دې موده کې کشف او له منځه وړل شوي.
د وزارت په وینا، د دعوت او ارشاد له لارې د حکومتي ادارو د کارکوونکو د سیرت، صورت او اخلاقو د اصلاح لپاره هم فعالیتونه ترسره شوي او د قومي او کورنیو شخړو زرګونه پېښې د منځګړیتوب له لارې حل او په دوستۍ بدلې شوې دي.
د معلوماتو له مخې، د احتکار، سود او د تاریختېر توکو د پلور مخنیوي په برخه کې هم د لسګونو زرو پېښو مخه نیول شوې او اړوند اقدامات ترسره شوي دي.