د ترکیې د ولسمشرۍ د اړیکو مرکز په یوه خبرپاڼه کې ویلي، چې د ترکیې ولسمشر رجب طیب اردوغان ویلي، انقره به د لبنان د امنیت او ثبات د ملاتړ لپاره خپلو ډیپلوماتیکو هڅو ته دوام ورکړي او له دغه هېواد سره به لازمې مرستې وکړي.
د خبرپاڼې د معلوماتو له مخې، اردوغان دا څرګندونې د لبنان له لومړي وزیر نواف سلام سره د استانبول په کتنه کې کړې دي.
خبرپاڼه زیاتوي، په دې کتنه کې د ترکیې او لبنان دوه اړخیزې اړیکې، سیمهییز پرمختګونه او د دواړو هېوادونو ترمنځ د همکاریو د پراختیا لارې پر لارو چارو خبرې شوې دي.
اردوغان ویلي، ترکیه له لبنان سره خپلو اړیکو ته ځانګړی اهمیت ورکوي او د دواړو هېوادونو ترمنځ د ډیپلوماتیکو اړیکو زیاتوالی به ګټور وي.
نوموړي ټینګار کړی، چې ترکیه به له لبنان سره د بشري مرستو په ګډون د ملاتړ ټولې ممکنې لارې چارې پر مخ یوسي.
د ترکیې ولسمشر همداراز ویلي، د لبنان او سوریې ترمنځ د ښه ګاونډیتوب د اړیکو پیاوړتیا به د سیمې په ګټه وي او انقره به د دواړو هېوادونو د اړیکو د لا پراختیا لپاره هڅې جاري وساتي.