د تش په نوم (انلاين) متحدې جبهې مشر سميع سادات يو ځل بيا د پاکستاني رژيم پر ننګه دريځ نيولی او په خبره یې په خیبر پښتونخوا او بلوچستان ایالتونو کې د داعش او نورو ډلو پر اهدافو د افغان حکومت د تېرې شپې بريدونه په کلکه غندي.
سميع سادات چې په خپل متن کې پښتونخوا او بلوچستان د پاکستان برخه ګڼلې، هلته پر داعش او د افغانستان پر ضد جوړو شويو اربکيانو شوي بريدونه بې باکه عمل بللی.
نوموړي ويلي «د پاکستان په خیبر پښتونخوا او بلوچستان کې د ملېشو پر اهدافو د طالبانو بريدونه غندم، دا چاره کېدای شي د پاکستان د یو لوی نظامي غبرګون راپارولو لامل شي».
د سميع سادات په ګډون د پرځول شوي جمهوريت ګڼ شمېر هغه نظامي لوړپوړي چارواکي چې د بېلابېلو جبهو تر نامه لاندې یې د افغان حکومت پر خلاف دريځ نيولی وخت ناوخت په ډېر محتاطانه ډول د پاکستان سره خواخوږي څرګندوي.