د صنعت او سوداګرۍ وزارت وایي، د قزاقستان مرستیال لومړی وزیر او د ملي اقتصاد وزیر سریک ژومانګارین د یوه لوړپوړي پلاوي په مشرۍ کابل ته رسېدلی دی.
وزارت زیاتوي، چې د دې سفر موخه د افغان ـ قزاق سوداګریز او اقتصادي فورم جوړول او په کابل کې د قزاقستاني تولیداتو او محصولاتو نندارتون پرانیستل دي.
د صنعت او سوداګرۍ وزارت په وینا، دغه فورم او نندارتون به د سوداګریز شراکت لپاره نوي فرصتونه رامنځته کړي، د سوداګرۍ کچه به لوړه کړي او د دواړو هېوادونو د خصوصي سکتور ترمنځ به د پانګونې جلب ته زمینه برابره کړي.
سرچینه زیاتوي، چې د ټرانزیټ، پانګونې، کرنې، د خوراکي توکو د پروسس او د خامو موادو د برابرولو برخې د دواړو هېوادونو د همکارۍ له مهمو محورونو څخه دي.