د جمهوريت پر مهال د بلخ والي او اوسمهال د تش په نوم مقاومت جبهې کليدي مشر، عطاء محمد نور په تازه څرګندونو کې ویلي، چې د «جنګسالار» او «قوماندانسالار» په نوم یادېدل ورته د شرم وړ نه دي، بلکې په خبره یې، پر دې نوم ویاړي.
نور ویلي «زه په دې جنګسالارۍ افتخار کوم او هېڅ شرم نه پرې کوم. که دا نوم هر چا راکړی وي، توپير نه کوي.»
هغه ادعا کړې چې د افغانستان د ازادۍ، د جمهوریت د نظام د جوړېدو او د هېواد د بیارغونې په برخو کې یې مهم رول درلود او په خبره یې، دوی د خپلې مبارزې پر مهال «وینه او قرباني» ورکړې او ډېرې ستونزې یې ګاللې دي.
عطاء محمد نور د حامد کرزي د واکمنۍ پر مهال د ترلاسه کړو دولتي موقفونو په اړه هم ویلي «موږ ته نه ده پکار څو له کرزي مننه وکړو، چې موږ ته یې دولتي منصبونه او څوکۍ راکړې وې؛ بلکې کرزی باید له موږ مننه وکړي، ځکه موږ مقاومت وکړ، وینه او قرباني مو ورکړه.»
هغه ويلي، چې ده او نورو جنګسالارانو هېواد ازاد کړی، څو د کرزي لپاره د هېواد تر ټولو لوړ مقام ته د رسېدو او د نورو لپاره د وزارتونو او ولایتونو پر څوکيو د کېناستو زمینه برابره شي.