د جمهوريت پر مهال د کورنیو چارو وزارت لومړی مرستیال هارونالرشید شیرزاد وایي، کله چې نوموړی دې وزارت ته د لومړي ملکي معاون په توګه معرفي شو، په لومړیو ورځو کې د وزارت د وضعیت له مطالعې وروسته د فساد او خپلسریو له یوې پراخې شبکې سره مخ شو.
شیرزاد وایي، په وزارت کې خیالي پولیس، د وژل شویو عسکرو کورنیو ته د اکرامیو په ورکړه کې ستونزې، په اعاشه او اباته کې فساد، د ولسوالیو د ناامنۍ ساختګي راپورونه، له قاچاقي او منظمو جرمي شبکو سره د پولیسو اړیکې، په قراردادونو کې فساد او په مهمو بستونو کې د سیاسي څېرو د خپلوانو ګمارنه موجوده وه.
د هغه په وینا، کورنیو چارو وزارت په عملي توګه د مفسدو کورنیو لپاره د عاید په دوکانونو بدل شوی و او د دې فساد او خپلسريو تر شاه د امرالله صالح او د نوموړي په خبره د نورو «لنډغرو» لاس و.
شیرزاد زیاتوي چې د ده له معرفي کېدو یوه اوونۍ وروسته امرالله صالح او ایوب سالنګي د ده پر دفتر په زور قبضه وکړه او هڅه یې وکړه چې نوموړی وزارت ته له ننوتلو منع کړي.
هغه ادعا کوي چې په ټول افغانستان کې د لنډغرو یوه خطرناکه شبکه جوړه شوې وه چې په اختطاف، هدفي وژنو، فساد، جنسي تېریو، قاچاق او نورو جرمونو کې یې لاس درلود.
شیرزاد په پای کې ويلي «ما شل کاله د لنډغرو سره تېر کړي؛ دوی د ولس لپاره زهرګنډیر دي.»