له ارګ څخه په خپره شوې خبرپاڼه کې راغلي، چې د ریاست الوزراء اداري مرستیال مولوي عبدالسلام حنفي د یوه پلاوي په مشرۍ د بګرام زندان له عمومي وضعیت څخه لیدنه کړې او د محبوسینو ستونزې یې اورېدلي دي.
د خبرپاڼې له مخې، د تشکیلاتو او معاشونو د تنظیم کمېسیون له غړو جوړ پلاوي د زندان بېلابېلې برخې ارزولې او د محبوسینو د روغتیايي خدمتونو، خوراکي توکو، ساتنې شرایطو او نورو اړوندو چارو په اړه یې معلومات ترلاسه کړي دي.
مولوي عبدالسلام حنفي له یو شمېر بندیانو سره د خبرو پر مهال د هغوی غوښتنې اورېدلي او د زندان مسوولینو ته یې سپارښتنه کړې، چې د اسلامي شریعت له مخې د محبوسینو حقوق مراعت، د هغوی د ژوند شرایط ښه او ستونزو ته پر وخت رسېدنه وکړي.
د بګرام زندان مسوولینو هم د محبوسینو د وضعیت او ترسره شویو اقداماتو په اړه پلاوي ته معلومات ورکړي او د غوره خدمتونو د وړاندې کولو ډاډ یې ورکړی دی.