د افغانستان د سوداګرۍ او پانګونې خونې په یوه خبرپاڼه کې ویلي، چې د یادې خونې عمومي رئیس سید کریم هاشمي په کابل کې د اذربایجان له سفیر الهام محمدوف سره د دواړو هېوادونو ترمنځ د اقتصادي او سوداګریزو اړیکو د پراختیا، ګډو پانګونو او د خصوصي سکټورونو د همکاریو په اړه خبرې کړې دي.
په خبرپاڼه کې ویل شوي، چې هاشمي د افغاني محصولاتو د صادراتو د پراختیا او له اذربایجاني سفیر څخه یې د پټرولو او ډیزلو د واردولو په برخه کې د افغان سوداګرو د همکاریو او د معتبره شرکتونو له عرضهکوونکو سره د هغوی د اړیکو د برابرولو غوښتنه کړې ده.
نوموړي اذربایجاني سوداګر او پانګوال هم د امام ابوحنیفه رحمه الله په پنځم ملي او نړیوال نندارتون کې د ګډون لپاره را بللي دي.
خبرپاڼه زیاتوي، چې د اذربایجان سفیر هم له افغانستان سره د اقتصادي او سوداګریزو اړیکو د پراختیا لپاره د خپل هېواد لېوالتیا څرګنده کړې ده.