لیکوال: سلمان باور
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
تاریخ ثابته کړې چې په افغانستان کې د جګړې پلوي تر ډېره بریده د برطانیې او د هغوی په لاس د جوړو شویو روبوټانو له لورې شوې او هر ځل یې هڅه کړې چې افغانستان نا امنه او د جګړې په اور کې وسوزوي.
د افغانستان امنیتي ځواکونو تازه د شر او فساد ډلې یو غړی او د آی ایس آی جاسوس نیولی دی؛ نوموړی په خپلو خبرو کې له ډېرو جالبو حقیقتونو پرده پورته کوي او هغه رازونه افشاء کوي، چې په پاکستان کې د آی ایس آی له لورې د افغانستان د ویجاړۍ لپاره تیارېږي، تر څو پکې جګړه پراخه او ناامني را منځته کړي.
نوموړی وایي: ما د هاشمي په نوم د یوه کس پر مټ په پېښور کې له څو کرنېلانو سره وکتل، چې په هغې کې یو د پېښور د امنیت مسؤل کرنېل شاهد او د آی ایس آی غړی لیاقت علي پاچا هم ګډون درلود.
هاشمي نومی کس چې په توسط یې د شر او فساد ډلې او آی ایس آی ته جالب جذب کېده؛ د افغانستان د پرځېدلي جمهوریت د شر او فساد ډلې د غړو د نومونو لېست ورکړ او ترې ویې غوښتل چې په اسلام اباد کې دفتر او په چترال کې یوه نظامي قرارګاه په واک کې ورکړي.
خو د آی ایس آی غړو ورته په خبرو کې ویلي، چې مونږ له تاسې سره ښکاره مرسته نشو کولی، ځکه د ا.ا.ا اړیکي د سیمې له هېوادونو سره ښې دي، خو که تاسې په مرکزي ولایاتو او واخان کې ناامني را منځته او د نړیوالو پام در واړوئ بیا مرسته کولی شو.
د نړیوالو پام د دې لپاره را اړول غواړي، چې بیا پرې د تېر په څېر پوځ مسلح او پاکستان د شته قرضونو له سخت بهرانه وباسي.
هغه پاکستان چې تر ننه یې چغې وهلې، چې ماته له ګاونډي هېواد افغانستان څخه خطر متوجې کېږي، ایا خطر همدا دی، چې د داعش او نورو باغي ډلو مخنیوی او د آی ایس آی ملا ور ماته شوې!؟
پاکستان په افغانستان کې د واخان او مرکزي ولایاتو جګړه ځکه غواړي، چې د افغانستان اقتصادي سیستم فلج او له نړۍ سره د وصل کېدو څخه پاتې شي.
یاد کس په خپلو خبرو کې دا هم زیاته کړې، چې د عبادي په نوم د یوه نفر پر مټ یې د تاجکستان ولسمشر ته یو لیکلی خط ورلېږلی، چې په لېکل شوي خط کې یې د تاجکستان له ولسمشر منننه کړې وه، چې د شر او فساد ډلې له مشرانو(احمدشاه مسعود، رباني) او د اوسنیو باغیانو سره یې مرسته کړې ده.
د شر او فساد ملګري چې د وطن په ټنډه تور داغ دی، له هیڅ ډول خباثت مخ نه ګرځوي، دوی د هغه پاکستان لپاره خپل ارزښتونه تر خاورو لاندې کوي، کوم پاکستان چې د افغانستان په بربادیو کې پوره ونډه او لاس لرلی.
احمد مسعود تېره ورځ د افغانستان د بهرنیو چارو وزارت هغه اعلامیه هم وغندله چې په پاکستان کې یې د تاؤ ترېخوالي د زیاتېدو په اړه خپره کړې وه او ویلي یې و، چې روان کړکیج سیمې ته ګواښ جوړولی شي؛ لامل یې نن دا را ووتلو، چې نوموړی د ای ایس ای د لېست په سر کې ځای لري.
پاکستان له نازک حالت سره مخ دی، هر طرف د امید په طمع لاس اچوي، چې کرایه شوي عسکر ورته د شر او فساد ډله برابروي.
د واخان له لورې د چین سره د افغانستان پیوستون به د پاکستان په روان وضیعت نور هم اغېز پرېباسي، ځکه د پاکستاني سامان الاتو اړتیا په منظم شکل او کم قېمت له چین څخه رفعه کېږي، نو پاکستان خپله بُهراني حالت ته حرکت کوي، چې له امله یې په سیمه کې د ناامنۍ طرفداري او جګړه خوروي.
پاکستان دې هڅه وکړي، چې د نورو هېوادونو په داخلي چارو او جګړو کولو کې دې ونډه نه اخلي، چې دا لمبې به یې خپل ګرېوان هم وسوزوي، په دې کار کې باید د پاکستان ولس له خپل ریاست سره مخالفت وکړي، چې سبا به یې دروند پور بیا دوی اداء کوي، ځکه حاکمه طبقه یې د امریکې او برطانیې د ماڼیو خلک دي او همالته به ور ګرځي.
