لیکوال: ډاکټر لطیف سجاد
د شر او فساد ډله یو ځل بیا غواړي چې د افغانستان په متدین ملت باندې د اقتدار نېشه سړه کړي، د دوی مرام یوازې او یوازې واک او قدرت طلبي ده؛ دغه د واک پر ګدۍ کښېناستل ورته که د افغانستان د خلکو د وینو او که د افغانستان د خلکو د عزت په بیه تمامه شي نو دوی به ترې انصراف ونه کړي.
تاریخ د دغسې واقعاتو شاهد دی چې د قدرت د هوس او د قدرت د نېشې په تکل یې ټول مصلحتونه یوې خوا ته کړي او ټول ارزښتونه یې داو ته وړاندې کړي او ځانونه یې د اقتدار رأس ته رسولي.
د پروفیسور برهان الدین رباني له استادۍ، شیخۍ او پروفیسورۍ سربېره د اقتدار چینجی مغز کې ښورېدل، که به د افغانستان هر ګوټ کې محاصره شو ویل به یې چې (من رییس جمهور افغانستان هستم).
تېر ځل چې د مشر ملا صاحب رحمه الله لښکرې له کندهاره را وخوزېدې، د شر او فساد په ضد یې جهاد اعلان کړ، رباني له امریکې مرسته وغوښته ترڅو د ده اقتدار وساتي، خو امریکې په سپین میدان پرېښوده، بیا یې روسانو ته منډه کړه.
تاجکستان چې د روسانو تر اغېز لاندې دی اول ځل رباني هلته لاړ، له هغه ځایه یې خپل حکومت اعلان کړ، خو په کولاب کې هم پاتې نه شو، مسکو ته یې مخه کړه او د افغانستان د پاچاهۍ چوکۍ یې هلته وتښتوله او ځان یې پاچا اعلان کړ.
له طالبانو سره یې د جګړې محاذ ګرم وساته، ولس ټول له طالبانو سره ودرېده او افغانستان یې له تورې ارتجا را وایسته؛ بچه بازۍ، قماربازۍ، د پیمخو هلکانو نڅول، خانخانۍ او قومندان بازۍ ملت تر پوزې راوستی، پاټکونو کې انساني سپيو خلک داړل، ولس له دغسې اختانقه امان غوښته، ټول په یو غږ د مشر ملا صاحب سره ودرېدل او د افغانستان له پاکې جغرافیې یې د شرونو او فسادونو کمبله ټوله کړه.
د شر او فساد لاروي هماغه خلک دي او غواړي چې ملت یو ځل بیا هماغې تورې ماضي ته ستانه کړي او افغان مېړنی ولس به هېڅکله بیا چاته اجازه ورنکړي چې د شر او فساد ډله د افغان میړني ولس په سرونو ور سپاره کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
