د ننگرهار په نازیانو ولسوالۍ کې د اوبو د مدیریت په برخه کې د یوې پروژې چارې پیل شوې دي.
د ننگرهار له ولایت مقام څخه په خپره شوې خبرپاڼه کې ویل شوي، د ننگرهار په نازیانو ولسوالۍ کې د ۱.۸ مېلیونه ډالرو په مالي لگښت د اوبو لگولو د یوې پروژې پرانیسته شوې ده.
په خبرپاڼه کې ویل شوي، یاده پروژه د جاپان PMS موسسې په مالي لگښت او تخنیکي چارو پلې کېږي. د یادې پروژې د پرانیستو په مراسمو کې د اوبو او انرژۍ ملا عبدالطیف منصور وویل، د دې پروژې په مټ به د دې ولسوالۍ ډېرې ځمکې خړوبې شي.:«د اوبو او انرژۍ په برخه کې يې په ټول هېواد کې يو شمېر پروژې پيل کړي او گڼ شمېر نورې په پلان کې دي چې ډېر ژر به تطبیق شي.»
نوموړي ویلي، د کونړ سيند پهمټ به د گمبيري درې دېرش زره هکتاره ځمکه خړوب کړي. :«ننگرهار چې صنعتي ولايت دی ډېرې برېښنا ته اړتيا لري او هڅه به وکړي چې د برېښنا توليد په برخه کې پکې مهمې پروژې پلې شي.»
د منصور په خبره، د اوبو او انرژۍ وزارت د اوبو سرچینو پیاوړي کولو، د اوبو مديريت، اړونده ادارو سره د کرنيزو ځمکو خړوبولو، انرژۍ توليد په برخه کې گڼ پلانونه لري.
د جاپان PMS موسسې يو مسوول انجينر ديدار مشتاق وويل، چې د دې پروژې له مخې د ۱.۸ مېلیونه امريکايي ډالرو په مالي لگښت په نازيانو ولسوالۍ کې د نهه کيلومتره په اوږدوالي څلور کانالونه، دولس چينې او يو کارېز په اساسي ډول ترميم کېږي او د باراني اوبو ذخيره کولو په موخه اووه نوي چيکډيمونه جوړېږي، چې په ټوليز ډول ۱۸۰۶ جريبه ځمکه به پرې خړوب شي.: «د دې کانالو خونديتوب او د اوبو ضايعاتو مخنيوي په موخه استنادي دېوالونه، سيفونونه، د بستر استر کاري، پلې لارې، د اوبو تقسيمولو دروازې، پلچکونه او نورې اړينې برخې هم جوړېږي.»
د يادونې ده چې د دې پروژې چارې به د ۲۰۲۶ز کال سيپتمبر مياشت کې پای ته ورسېږي، چې PMS موسسه به د پینځو کالونو لپاره د دې پروژې حفظ او مراقبت وکړي او بيا به يې د سينديزې حوزې رياست له لوري ساتنه کېږي.
د یو بل خبر له مخې، د اوبو او انرژۍ وزیر د ننگرهار په کوټ ولسوالۍ کې د ۹۱۹زره امریکايي ډالرو په مالي لگښت د ۵ کیلومتره کانال گټې اخیستنې ته وسپارل شو.
په دغه کانال کې يو سربند، پينځه کيلومتره کانال، دوه د سېلابي او چينو اوبو ذخیرې گټې اخيستنې ته وسپارل شوې. یاد پینځه کیلومتره کانال د ۸۳زره متره مکعب په ظرفیت د سېلابي اوبو او د ۲۵۰۰ متر مکعب په ظرفیت د چینو اوبو ساتلو ظرفیت لري.
د یادونې وړده، چې د دغې پروژې په پلې کولو سره ۶۰۰ جریبه ځمکه په تلپاتې توگه او ۲۲۵۰ جریبه ځمکه په موسمي ډول تر اوبو لگولو لاندې راغلې چې ۶۰۰۰ کورنۍ به په مستقیم او غیر مستقیم ډول ورڅخه برخمنې شي.
