د کابل ولایت مقام په یوه خبرپاڼه کې ویلي، چې د دې ولایت د والي ملا امین الله عبید په مشرۍ د امنیتي او تصفیوي چارو کمېسیون په نوبتي غونډه کې، د امنیتي ادارو ترمنځ د همغږۍ د پیاوړتیا، د امنیتي جوړښتونو د تنظیم او صفوفو د تصفیې بهیر د لا اغېزمنتیا پر لارو چارو ټینګار شوی.
د خبرپاڼې له مخې، په غونډه کې د مرکزي زون د نظامي محکمې رئیس، د کابل د علماوو شورا مرستیال، د استخباراتو رئیس، د ۳۱۳ مرکزي قول اردو مسوول، د کابل امنیه قوماندانۍ مرستیال او د حکمونو او فرامینو د تعقیب او نظارت رئیس ګډون کړی و.
غونډه د امنیت د ټینګښت، د اړوندو ادارو ترمنځ د همغږۍ د پیاوړتیا، په کابل ښار او ولسوالیو کې د امنیتي او تصفیوي کمېسیونونو د جوړېدو او د صفوفو د تصفیې اړوند موضوعاتو ته ځانګړې شوې وه.
خبرپاڼه زیاتوي، چې د غونډې په پای کې پرېکړه شوې، چې د امنیتي ارګانونو ترمنځ به همغږي لا پراخه او د کابل ښار او ولسوالیو د امنیت د ټینګښت او د صفوفو د تصفیې بهیر به په لا اغېزمن ډول پرمخ یووړل شي.