د افغان حکومت مرستیال ویاند ملا حمدالله فطرت پر خپله اېکس پاڼه لیکلي، چې د افغان حکومت مشرتابه د کندهار ولایت په مقام کې د دغه ولایت د ولسوالیو او ښار د حوزو له علماوو، متنفذینو او یو شمېر مسوولینو سره په غونډه کې ګډون او وینا کړې ده.
مشرتابه د دیني لارښوونو ترڅنګ، د خلکو د اصلاح او د اسلامي نظام د پیاوړتیا په برخه کې د هغوی پر مسؤلیتونو ټینګار کړی او د دیني ارزښتونو ساتنه، د شرعي احکامو بیانول او خلکو ته سمې لارښوونې یې د علماوو مهمه دنده بللې
د ښاغلي فطرت په خبره، مشرتابه له علماوو غوښتي، چې د ټولنې د اصلاح لپاره هڅې وکړي، د منکراتو په مخنیوي کې خپل رول ادا کړي، د ځوانانو د تعلیم او سالمې روزنې لپاره کار وکړي او د خلکو ترمنځ د یووالي او همغږۍ روحیه پیاوړې کړي.
په غونډه همداراز ټینګار شوی، چې علماء او مسوولین باید د خپلو دندو په ترسره کولو کې تقوا، اخلاص او عاجزي خپله کړي او د خلکو د خدمت او هدایت لپاره هڅې دوامدارې وساتي.
د معلوماتو له مخې د غونډې په پای کې علماوو له مشرتابه سره خپل بیعت تازه کړی او د اسلامي نظام د ملاتړ او پیاوړتیا لپاره یې د همکارۍ ژمنه کړې ده.