د کانونو او پټرولیم وزارت په یوه خبرپاڼه کې ویلي، چې د یاد وزارت وزیر ملا هدایتالله بدري د قطر له سفیر ډاکټر مردف بن علي القاشوطي سره په کابل کې لیدلي او د افغانستان د کاني زېرمو، په ځانګړي ډول د نفتو او ګازو په برخو کې یې د پانګونې پر فرصتونو خبرې ورسره کړې دي.
د کانونو او پټرولیم وزارت ویلي، چې په دې لیدنه کې د افغانستان او قطر ترمنځ د سیاسي او اقتصادي اړیکو ترڅنګ، د خامو نفتو د معیاري تصفیې خونې د جوړولو پر څرنګوالي هم بحث شوی دی.
د خبرپاڼې له مخې، د قطر سفیر په یادو برخو کې د خپل هېواد د پانګونې لېوالتیا څرګنده کړې او ملا هدایتالله بدري د قطر د همکاریو هرکلی او د هر ډول همکارۍ ډاډ ورکړی دی.