د امریکا د کلفورنیا ایالت د لاس انجلس په مرکزي سیمه کې اور لګېدنې زرګونه مهمې او قیمتي ودانۍ سوځولي او هغه سیمه یې هم سخته اغېزمنه کړې چېرې چې د هالیووډ د مشهورو شخصیتونو کورونه وو.
د رسنیو د راپورونو له مخې، د لاس انجلس په یوه څنډه، پیسیفک پیلیسیډز کې د ګڼو پېژندل شویو شخصیتونو کورونه هم د اور له امله ویجاړ شوي دي.
د اټکل له مخې په دې سیمه کې د یوه کور منځنۍ بیه درې میلیونه ډالره ده.
په دغه اورلګېدنه کې د «پیلیسيډ چارټر عالي لیسه» په نوم هغه ښوونځی هم زیانمن شوی کوم، چې د ټین وولف، کیري او فریکي فرایډي په څېر فلمونو کې ښودل شوي، دغه ښوونځی په وروستۍ اور لګېدنه کې سخت زیانمن شوی دی. د لاس انجلس یونیفایډ سکول ډسټرکټ په وینا اور د ښوونځي ټولګي، د ټینس لوبغالي او د بیس بال میدانونه ویجاړ کړي.
له ښوونځیو او روغتونونو ورهاخوا په دغه اور کې د ویل روجرز ایالت تاریخي پارک د هالیووډ د پخواني اداکار ویل روجرز ۳۰۰ جریبه ملکیت هم د اور له امله له منځه تللی دی. د کالیفورنیا ایالت پارکونو د ساتنې ادارې په وینا، په دغه اور کې د ول راجرز زوړ کور هم له اور څخه نه دی ژغورل شوی.
له دې سربېره په دغه سیمه کې د «ګیټي ویلا» موزیم هم د اور له امله زیانمن شوی، په دغه ځای کې بوټي سوځېدلي، خو د رومي هنر قیمتي ټوټې لا هم خوندي دي، یاد موزیم د ارام سمندر په څنډو کې جوړ شوی.
د لاس انجلس اورلګېدنې له تاریخي او هنري سیمو سربېره یو شمېر مهم مذهبي مرکزونه په ځانګړي ډول د یهودي مذهب اړوند لرغوني مرکزونه هم زیانمن کړي. چې مهم پکې د «پاساډینا» په نوم یهودي معبد او مرکز و، په دغه مرکز کې چې له شلمې پېړۍ راهیسې رامنځته شوی، ډېری ودانۍ د اور له امله ویجاړې شوې دي.
د لاس انجلس په دغه بې سارې اورلګېدنې کې د ګڼو شخصیتونو کورونه او مالونه هم زیانمن شوي دي.
د راپورونو له مخې، د «لاس انجلس لیکرز» د مشر روزونکي «جی جی ریډيک» کور هم ویجاړ شوی دی. امریکایي کامیډین او اداکاره روزي اوډونیل پر ټیک ټاک یوه ویډیو خپره کړې او لیکلي یې دي چې کور مې ختم شوی.
د کوک بوک لیکوال او د تلویزیون کوربه «سنډرا لي» په انسټاګرام لیکلي، چې هغه په یوه هوټل کې اوسېږي ځکه چې هغه نور کور نه لري.
همدا ډول، جیمز ووډز (سي این این) ته ویلي، چې مخکې له دې په اور کې ښکېل شي د سې شنبې په ورځ یې کور پرېښی دی.
د لاس انجلس د اورلګیدنې په پایله کې اداکاره کیري الیوس، کامیډین جان ریورز، اداکار کیمرون میتیسن او اداکاره ریکي لیک هم خپل کورونه له لاسه ورکړي دي.
د رویټرز خبري اژانس د راپور له مخې، په ځینو ویډیوګانو کې د انتوني هاپکنز، جان ګوډمین او میلس ټیلر کورونه هم په اور کې لیدل کیږي.
د امریکا له لاس انجلس څخه خپاره شوي وروستي معلومات ښيی چې، په دغه اورلګېدنه کې تر ۳۷ زره هکتاره ډېره ځمکه سوځېدلې چې په ترڅ کې یې یاده سیمه یوې جنګځپلې سیمې ته ورته شوې.
