د هندوکشغږ سرچينو د عبدالرشيد دوستم د يو خصوصي مجلس ځينې اطلاعات او جزئيات تر لاسه کړي، چې د سميع سادات په مشرۍ د متحدې جبهې په اړه يې هم ځينې څرګندونې په کې کړې دي.
دغه خصوصي مجلس څه موده وړاندې په آنلاين ډول د فضل احمد معنوي، يونس قانوني او عطا محمد نور په شمول له یو شمېر پخوانیو سياسيونو سره ترسره شوی دی.
په یاد مجلس کې عبدالرشید دوستم په ښکاره ډول ويلي، چې د سميع سادات په مشرۍ متحده جبهه د امريکايانو لخوا حمايه کېږي او د امريکايي اهدافو لپاره جوړه شوې ده.
عبدالرشید دوستم د دې جبهې په اړه خپل دريځ په صریحو الفاظو څرګند کړی او وايي، چې مونږ او دوی(متحده جبهه) به په هيڅ صورت کې ګډ کار ونه کړو، ځکه لارې مو سره بېلې دي او د سميع سادات تر څنګ د هغه ټيم زمونږ لپاره د باور وړ خلک نه دي.
د هندوکشغږ د معلوماتو په اساس تېر کال د متحدې جبهې د تشکيل او اعلان په اوایلو کې سميع سادات د خوشحال سادات په مشرۍ يو پلاوی تاجکستان ته لېږلی و، تر څو د احمد مسعود له ټيم سره په دې اړه خبرې اترې وکړي چې څنګه وکولای شي په ګډه د طالبانو په وړاندې فعاليت وکړي، خو هغه مهال دا خبرې ځکه له ماتې سره مخ شوې، چې مقاومت جبهه له متحدې جبهې څخه جلا او متفاوت اهداف او داعيه لري او له امريکايانو سره د ځينو مخالفو جهتونو نفوذ ورباندې شته، له همدې امله نشي کولای چې په ګډه فعاليت ترسره کړي؛ له دې سره د خوشحال سادات په مشرۍ دغه پلاوی له تاجکستان څخه بيرته ناهيلی ستون شو.
مقاومت جبهه چې په تاجکستاني جبهې، پنجشير جبهې، د احمد مسعود کورنۍ جبهې او ورته نورو انحصاري نومونو مشهوره شوې ده؛ د متحدي جبهې په شمول له آزادۍ جبهې، مقاومت شوری، عبدالرشيد دوستم، عطا محمد نور، نورو شخصيتونو او جريانونو سره د خپلو انحصاري او عقده يي سياستونو او بېرونيو اغېزو له امله ژور اختلافات لري؛ خو د عبدالرشيد دوستم لخوا د متحدې جبهې په اړه دا ډول څرګندونې بې سابقې دي او د دې امکان يې نور هم کم کړی دی چې د افغان حکومت مخالفين دې پر يوه مېز د مشترکو اهدافو لپاره سره راټول او متحد شي.
