یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د افغانستان په پراخه لمن کې د فسادیانو له لورې د جګړې پیل او د کابل ښار د لوټې-لوټې کولو را وروسته تر ننه شریر او باغیان د جګړې پلوي په ډېره کلکه کوي.
ځکه د دوی په جګړو کې ګټې خوندي دي، په لانجو او فسادو کې د وطن په جغرافیه او ملي شتمنیو د سودا کول، د طبعي زېرمو لوټل او په بادارانو یې په کمه بیه خرڅول پکې عادي وي.
د همدې لپاره چې خیانتونو او فسادونو ته لار برابره او اسانه شي، نو باید او باید په هېواد کې جګړې، یرغلګر، نسل وژنه او ټکونه موجود وي.خیانتونو ته د زمینه سازۍ لپاره دوی په افغانستان کې په مسلسله توګه د جګړې غوښتنه کوي، که تاسې يې هره مرکه واورئ حتمن به د افغانستان په حق کې د سختې ویجاړۍ پلوي وي.
د همدې لپاره د مقامت خیالي جبهې ډلې د فرانسې او امریکا چارواکو ته په پښو کې سرونه ایښي دي، چې په افغانستان کې بیا جګړه پیل کړي.
کله نا کله د کوم انسټیټیوټ په فراغت غونډه کې په مکر او زاریو ځان میلمه کړي، خو پر ځای د دې چې په هماغه موضوع وغږېږي، برعکس د افغانستان په اړه له حقیقت څخه لېري څرګندونې کوي، چې ډېری وخت یې خبرې د ډالرو پر سوال را څرخي.
کله وايي: افغانستان ته روانې بشري مرستې بندې کړئ او دغه مرستې مونږ ته راکړئ چې جګړه وکړو؛ او کله وایي: په افغانستان یرغل وکړئ مونږ مو کرایه شوې میلشې یو.کله د داعشي خوارجو په نوم د اهل تشیع هېوادوالو بې ګناه نسل وژنه پیل کړي، بیا ورته په پېغوریزه لهجه د وسلې د پورته کولو مشورې ورکوي، خو خپله د بادار په غېږ کې د همدې ملت په تښتول شویو پیسو په جوړ شویو بلند منزلو کې ناست دي.
دوی ته د افغانستان څلویښت میلیونه وګړي بشر نښکاري او خپل یو څو لنډغر او سړي خواره چې افغاني غرور او شان یې سوالیه کړی متدین او بشر ښکاري (عجیبه انصاف دی).
د شر او فساد د لارویانو سترګې دومره پټې دي، چې له هر څه مخکې دوی لومړی د افغانستان په غیرتي او ازاد ولس د سختیو راوستلو کوښښونه او هڅې کوي.
احمد مسعود نازدانه هم د خپل پلار په پل، پل ږدي او خلکو ته ښیي چې که پلار یې له شوروي او امریکایي یرغلګرو سره پټ تړونونه کول، نو زه لږ جرأت مند یم، په ښکاره ورته سوال او زارۍ کوم چې افغان وطن او وطنوال برباد کړي.
د مسلمانانو سره د کفارو دښمني تر قیامته ده، دا زه نه وایم، بلکې دا الله تبارک وتعالی په قران کریم کې فرمایي: وَلَنْ تَرْضَى عَنْكَ الْيَهُودُ وَلا النَّصَارَى حَتَّى تَتَّبِعَ مِلَّتَهُمْ [سورة البقرة:120].ژباړه: هیڅکله به مو دوستان/ملګري نه شي یهود او نصاری تر هغې چې تاسې د دوی په ملت نه شئ.
یوه بله نقطه چې یادول یې اړین دي؛ امریکا چې له افغانستان څخه کابو شل زره کیلومتره لېري پرته ده، هغوی له هغه ځای څخه د افغانستان غېږي ته راځي، خپل ځان، مال او شتمني ټول هر څه په خطر کې اچوي؛ دلته په مونږ بمونه وروي، په وهلو او ټکولو، تړلو او شړولو مو تر ګونتانامو او نورو زندانونو رسوي، خو د شر او فساد لارویان په خپله غېږه کې کلک نیسي، کمپونه ورته جوړوي او…لامل یې څه کېدای شي!؟دا پوښتنه تاسې درانه لوستونکي خپله ځواب کړئ.
دوی د جګړې دوامداره غوښتونکو ته که همدا نن هم د ملت شتمني او حق ټوله په واک کې ورکړل شي جګړه نه کوي، ځکه دوی د ملت د شتمنۍ په لوټلو او تښتولو معتاد شوي دي؛ خو یوه بله خبره هم باید ورسره ومنل شي، چې هغه یې د بادار فرمایشات دي، په هیڅ صورت دوی د بادار ګټه له نظره نه شي غورځولی، ځکه دوی نعوذ بالله د الله تعالی پر ځای د فرانس، امریکې، تاجکستان، ایران او ځینو نورو بنده ګي کوي.
ادامه لري…
