تاریخ د بې شمیره داسې کسانو کيسې له ځان سره لري چې د شخصي ګټو په خاطر یې تر یو مقدس شعار لاندې سیاست ته ور دانګلي او ځانونه یې د شهرت پوړیو ته رسولي. په افغانستان کې د دې ډول کسانو لپاره د خپل تور فعالیت زمینه هغه وخت برابره شوه چې د شوروي یرغل پر مهال افغان مجاهدینو ته نړیوالې مرستې را ماتې شوي؛ دلته نو ډېرو شخصیت لرونکو خپل اصلي هدف هیر کړ او په مادي لحاظ د ځان بسیاینې لپاره یې کار پیل کړ.
کله چې له افغانستان څخه د شوروی اتحاد پوځونه ووتل او د ډاکتر نجیب حکومت سقوط وکړ نو همدا تورې څهرې وې چې د خپلو شخصي ګټو لپاره یې هیواد ته هر ډول خطر متوجه کړ.
د کورنیو جګړو پر مهال د مال او شتمني حرص اخيستي سیاستوالو د ولس له هیڅ شي مخ نه ګرځاوه؛ کله چې یې د ولس په لوټلو تنده نه شوه ماته نو بیت المال ته یې مخه کړه، د هیواد ټول تجهیزات یې په ګاونډیو و پلورل.
همدې تورو څهرو د امریکایې یرغل پر مهال د امریکایانو څنګ ونیوه، ځکه CIA د ډالرو پراخې کڅوړې ددې لپاره را وړې وې چې د افغان سیاست تورې څهري پرې را ونیسې.
امریکایانو دومره وکړل چې همدا توري څهرې یې په یوه غونډ (شمالي ټلواله) سره را غونډې کړې؛ په دې سره شماله ټلواله د افغانستان په نوي حکومت کې د مهمو پوستونو خاوندان شول چې د خارجي مرستو تر څنګ یې د داخلي عوایدو د لوټلو صلاحیت هم پیدا کړ؛ د دوی هر یوه غټ مقدار پیسې پیدا کړې او ځینې خو یې میلیونران هم شول.
دې تورو څهرو د دې پر ځای چې خپل برمته کړي پیسې په افغانستان کې مصرف کړي، په بهرنیو هیوادنو کې تجارتونه پرې جوړ کړل؛ دوی په افغانستان کې د عوامو لپاره قانونیت شعار ور کاوه خو د خپلو ځانونو لپاره د قانون ټول مواد په لاس کې اخیستي وو.
طالبان چې کله په دوهم ځل د ارګ تر دروازې ورسېدل او واک یې تر لاسه کړ نو همدا د تور فعالیت تورې څهرې هماغه هیوادونو ته لاړل چې دوی پکې د ځان د غلامۍ په بدل کې تجارتونه جوړ کړي وو.
د طالبانو دا بریا په شمالي ټلوالې تندر شوه ځکه د دوی شوم فعالیت یې ور شنډ کړ؛ هماغه وو چې د مقاومت جبهې په نوم یې د اوسني حکومت پر ضد د شر او فساد هڅې پیل کړې، چې په داخل کې د طالبانو د پیاوړو جنګيالیو پر مټ سخت وځپل شول او تیښتې ته اړ شول.
د مقاومت جبهې تور فعالیت له پخوا هم خلکو ته معلوم وو خو په دې وروستیو کې د دوی له خپلو کسانو داسې رازونه افشاء شول چې د همدې تورو څهرو تور فعالیتونه په ثبوت رسوي.
قومندان ګل حیدر چې د شمالي ټلوالې مخکښ غړی او د دې ډلې پخواني مشر احمدشاه مسعود ته نږدې کس وو، تازه په یوه غږیز کلیپ کې ویلي:«هغه پیسې چې له انګلستان او اروپا څخه راټولېږي، بېوزلو خلکو ته د ورکړې پر ځای، د احمد مسعود او امرالله صالح لهخوا په امریکا او اروپا کې د موټرونو او کورونو په اخیستلو لګېږي».
هغه همداراز ویلې چې:«د ملت ټولې پیسې یې ولوټلې؛ حتی کله چې ځینې وژل کېدل، په جیبونو کې یې ډالر لرل؛ د بېلګې په توګه، د آمر صاحب(احمد شاه مسعود) خورزوی د وژل کېدو پر مهال په خپل جیب کې پنځوس زره ډالر لرل».
د قومندان ګل حیدر یادي خبري نه یواځې د همدې تورو څهرو تور فعالیت په ډاګه کوي، بلکې د مقاومت جبهې تر منځ د اختلافاتو او بې اعتمادۍ په ډېر والي هم دلالت کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
