تسنیم خبري اژانس راپور ورکړی، چې د اسرائیلو رژیم لومړي وزیر بنیامین نتانیاهو ویلي، د امریکا هغه غوښتنه به ونه مني، چې له غزې، سویلي لبنان او د سوریې له ځینو سیمو څخه د اسرائیلي رژیم ځواکونو د پراخ شاتګ غوښتنه پکې شوې ده.
اسرائیلي رسنیو راپور ورکړی، چې نتانیاهو دا څرګندونې د امنیتي کابینې په غونډه کې، واشنګټن ته د خپل سفر او د امریکا له ولسمشر ډونالډ ټرمپ سره د لیدنې تر مخه کړې دي.
نتانیاهو همدارنګه ویلي، له ټرمپ سره په لیدنه کې به د ایران د اټومي پروګرام د دوامدارې څارنې پر اړتیا ټینګار وکړي او خبرداری یې ورکړی، چې تهران ښايي د خپل اټومي پروګرام د بیا احیا هڅه وکړي.
نوموړي ایران ته په اشارې ویلي، هر ډول مستقیم برید یا د نیابتي ډلو له لارې اقدام به د اسرائیلو له «قاطع ځواب» سره مخ شي.
ټاکل شوې چې نتانیاهو د سېشنبې په ورځ په سپینه ماڼۍ کې له ډونالډ ټرمپ سره وګوري، چې د ایران، غزې، سوریې او لبنان وروستي وضعیت به یې د خبرو مهم محورونه وي.