سي اېن اېن خبر ورکړی، چې د اسرائیلو لومړی وزیر بنیامین نتنیاهو د امریکا پلازمېنې واشنګټن ته رسېدلی، چې ټاکل شوې د امریکا له ولسمشر ډونالډ ټرمپ سره د ایران، سیمهییز امنیت، د امریکا-اسرائیلو دفاعي همکاریو او د منځني ختیځ پر وروستیو تحولاتو خبرې وکړي.
د CNN د راپور له مخې، نتنیاهو غواړي ټرمپ ته د ایران د اټومي او پوځي فعالیتونو په اړه تازه معلومات وړاندې کړي او د امریکا د راتلونکو امنیتي پرېکړو په اړه به ډاډ ترلاسه کړي. په خبرو کې به ترکیې ته د F-35 جنګي الوتکو احتمالي پلور، د سعودي عربستان اټومي همکاري او د امریکا-اسرائیلو د اوږدمهالې دفاعي هوکړې موضوعات هم شامل وي.
راپور زیاتوي، چې دا لیدنه په داسې حال کې ترسره کېږي، چې د ایران جګړې، د لبنان اوربند او په غزه او سوریه کې د اسرائیلو د پوځي حضور په اړه د ټرمپ او نتنیاهو ترمنځ اختلافونه زیات شوي او تمه کېږي دواړه مشران د دغو موضوعاتو په اړه هم خبرې وکړي.