د سټنډرډ ملي اداره وايي، د نیمروز په بندر له لارې د ۱۱ ټانکره بېکیفیته تېلو د واردولو مخه نیول شوې ده.
له یادې ادارې څخه په خپره شوې خبرپاڼه کې ویل شوي، د سټنډرډ ملي ادارې د څار په پایله کې ۱۱ ټانکره بېکیفیته تېل بېرته ایران ته گرځول شوي دي.
په خبرپاڼه کې له ټولو سوداگرو غوښتل شوي، چې هېواد ته د بېکیفیته توکو د واردولو څخه ډډه وکړي او سم توکي دې وارد کړي.: «د سټنډرډ ملي اداره له ټولو ملي سوداگرو څخه غواړي چې د هېوادوالو د روغتیا او خوندیتوب په نظرکې نیولو سره د ماشینونو، وسایلو او وسایطو د ساتنې په موخه هېواد ته له سټنډرډونو سره سم توکي وارد کړي.»
د سټنډرډ ملي اداره د هېواد په ټولو بندرونو کې د هغو توکو مخه نیسي، چې کیفیت یې خراب وي.
د یادې ادارې د معلوماتو پر بنسټ، په تېرو دوو میاشتو کې یې ایران ته ۱۶۰ ټانکره بېکیفیته تېل بېرته ورگرځولي دي.
که څه هم اوس د هېواد په گمرکونو کې د ټولو وارد شوو توکو سمه څېړنه کېږي؛ خو لا هم هره اوونۍ افغانستان ته سلگونه ټنه بېکیفیته توکي واردېږي، چې ډېره برخه یې درمل او خوراکي توکي دي.
