نیویارک ټایمز راپور ورکړی، چې د امریکا ولسمشر ډونالډ ټرمپ د خپل حکومت له لوړپوړو سلاکارانو او وزیرانو سره غونډه کړې، ترڅو د ایران پر وړاندې د پوځي بریدونو د پراخولو په اړه پرېکړه وکړي.
دغه غونډه وروسته له هغې ترسره شوې، چې د تهران او واشنګټن ترمنځ د اټومي بېوسلې کولو په هدف د خبرو اترو نازکه هوکړه له منځه ولاړه.
راپور زیاتوي، چې ټرمپ د ایران پر وړاندې په خپل چلند کې له یوه برخلیک ټاکونکي پړاو سره مخ دی. سپینې ماڼۍ تر اوسه په رسمي ډول نه دي ویلي، چې د تهران پر ضد د نویو اقداماتو په اړه وروستۍ پرېکړه شوې که نه.
ټرمپ ویلي، د امریکا پوځ د هغه د امر په صورت کې د لا سختو بریدونو ترسره کولو ته بشپړ چمتووالی لري، خو د کړکېچ د حل لپاره یې د ډیپلوماسۍ دروازه هم پرانیستې پرېښې ده.